L’organisaziun «Humanosh» è ina fundaziun independenta cun sedia a Warschau en Pologna. La finamira principala è da gidar, surtut medicinalmain a l’Ucraina. Uschia organisescha l’organisaziun regularmain transports cun blessads or dal pajais ma era dimora per fugitivs en pliras chasas en Pologna. Per pudair gidar dovra quai material ed ina part da quel vegn or da la Svizra ed or da la Surselva. Il motiv principal è ch'Ignaz Derungs, oriund da Tavanasa e sesent a Turitg s’engascha fitg per quest'organisaziun. Suenter l'emprim contact a Regensdorf cun l’organisaziun haja el discurri cun ils iniziants e la lavur che quels prestan haja fatg ina gronda impressiun, uschia ch’el saja sa decis da gidar, declera Ignaz Derungs.
A Glion per engraziar
La sentupada a Glion è stada da tempra fitg persunala. Las dunnas ed ils umens che s’engaschan a Glion han preparà in buffet per las visitas e lezzas han raquintà da lur lavur. Era preschentà han els material da guerra or da l’Ucraina per mussar che la guerra è datiers là nua ch’els ageschan. Uschia sajan ils transports en l’Ucraina stentus e privlus, ma fitg impurtants perquai che la populaziun haja propi da basegn da l’agid, declera l'iniziant Piotr Skopiec ch’ha fundà l’organisaziun ensemen cun sia dunna Katarzyna. L'apotecher e sia dunna s’engaschan fitg ferm per pudair gidar ed ins senta vida els il fieu che brischa per lur lavur.
Pneus vegls quasi aur en l’Ucraina
Ma la delegaziun da «Humanosh» è betg sulet vegnida per engraziar mabain era per prender cun els tut il material rimnà. Surtut pneus èn il mument fitg tschertgads. Quai haja da far che las vias na sajan betg bunas en l’Ucraina. Els sajan mintg’emna da viadi en la regiun da guerra e la vita da quels pneus saja savens curta e perquai sajan pneus quasi sco aur, declera Ignaz Derungs. Ma la camiunetta da 7,5 tonnas n’ha betg plaz per tut ils pneus vegls ed ins senta vida las visitas or da l'ost ch’els èn frustrads da stuair laschar enavos urden.
Fin uss ramassà quasi 500 tonnas material
L’organisaziun ha fin uss ramassà quasi 500 tonnas material en l’entira Europa e transportà tut en l’Ucraina. La finamira saja adina da vegnir svelt cun l’agid tar las persunas ch'han basegn. Quai possian els sco organisaziun independenta far svelt, uschia saja per regla tut il material entaifer duas emnas al lieu. Quai na possian las organisaziuns grondas betg far tuttina, declera Ignaz Derungs. Perquai saja lur agid era fitg apprezià e savens possian els agir pli nuncumplitgà. Ma surtut saja da menziunar che senza il sustegn da tut quellas persunas che s’annunzian tar el na vegnissan els betg da gidar sco uss, di Ignaz Derungs. Ed il proxim transport è anc quest onn. Uschia vegnan ils represchentants da «Humanosh» anc il december puspè en Surselva per charrar il material d’agid en l’Ucraina.
