Ils gestiunaris da las pendicularas da Cuira han pudì preschentar cifras da record per il 2021 e 2022. Cunzunt la stad saja stada fitg buna, han ellas communitgà. Las pendicularas sa finanzieschian cun ina quota dad 84% sezzas.
En il transport han las pendicularas fatg in retgav dad 1,94 milliuns francs. Uschè aut sco anc mai. Gia dapi il lockdown hajan ins mo gì ina sminuziun da 10% en la svieuta. Er sch'ils custs da mantegniment sajan creschids, giaja bain cun las pendicularas. Ils pretschs d'energia pli auts sentian ins dentant er. Ils custs sajan creschids per 10% dapi il cumenzament da la guerra en l'Ucraina.
Nov implant e cabina en planisaziun
Il mument da remplazzar l'implant da pendicularas vegn pli damanaivel. Proxima primavaira inoltreschan las pendicularas la dumonda d'approvar la planisaziun a Berna. Plinavant sajan els en contact cun organisaziuns da protecziun d'ambient. La cabina da Garaventa che las pendicularas vulan cumprar vegn exponida a la via da posta a Cuira, perquai ch'ins haja cuntanschì in mument decisiv. 2026 duai ils nov implants ir en funcziun.