En general èn las pendicularas grischunas enfin uss cuntentas cun la stagiun d'enviern 2022/23. Ina stagiun ch'era per tut ils territoris ina sfida ed ha duvrà blera flexibilitad cun dis da fradaglia e chalurs.
Fitg buna prevendita e mediocra fin buna vendita da bigliets dal di
Cunzunt la buna prevendita dals abunaments da stagiun hajan savens spendrà ils territoris che han en general vendì in zichel pli paucs bigliets dal di ch'ils onns avant.
Decisivs sajan quest onn en mintga cas stads ils chanuns da naiv. Territoris che n'han betg pudì producir naiv artifizial, hajan gì nagina schanza da porscher pistas, di tranter auter Silvio Schmid da l'Arena da skis Andermatt-Sedrun:
Senza chanuns da naiv na fissan nus quest onn pratic betg ids cun skis.
Giasts cuntents
Tut ils territoris da skis dumandads han ditg, ch'els sajan intgantads dals blers resuns positivs dals giasts. Lez hajan savens strusch pudì crair, che las pistas sajan preparadas uschè bain, malgrà la pauca naiv, dian tranter auter ils territoris da Laax, Andermatt-Sedrun, Arosa/Lai e Scuol. Per Silvio Schmid haja quai mussà ch'ils giasts èn pli spert cuntents sch'igl ha be pauca naiv.
Sper la pauca naiv saja la communicaziun stada ina sfida supplementara quest enviern, di tranter auter Andri Poo, directur da las Pendicularas Scuol.
Igl è stà ina sfida da communitgar envers ils giasts ch’ins possia ir bain cun skis ed en general da communitgar cura che tge è avert.
Ina stagiun che cuzza enfin la fin planisada
Tut ils territoris da skis dumandads partan oz dal fatg, ch’els pon laschar ir las sutgeras, gondlas ed ils runals enfin la fin planisada. Quai è tar ils blers mez avrigl.
