Il traffic da persunas resta il segment il pli ferm da la Viafier retica ed è il motor dal success actual. La svieuta en quest sectur è creschida sin 147,2 milliuns francs, quai che correspunda ad in augment da 12,2% en cumparegliaziun cun l'onn precedent. Quai scriva l'interpresa en la communicaziun tar las cifras annualas.
En cumparegliaziun cun avant la pandemia da corona l'onn 2019 ( 99 milliuns francs) munta il plus tar la svieuta dal traffic da persunas fin la fin dal 2025 bundant 50%. Raschuns per quest augment èn cunzunt dapli viagiaturas e viagiaturs singuls sco er abunaments.
Bernina Express puspè fitg bain frequentà ed en general pli punctual
Il Bernina Express ha danovamain cuntanschì resultats sur la media. Il gudogn dal segment munta ad 8,9 milliuns francs. La auta dumonda per las purschidas en il traffic da temp liber ed en il traffic regiunal è restada constanta. Era tar ils kilometers da persunas è vegnì surpassà l'onn da record 2024 anc ina giada per 10%.
Sa sviluppada positivamain è er la punctualitad en il traffic da persunas. Ella è s’augmentada sin 91,5%. Quai malgrà blers plazzals ed in augment dal traffic. Quai saja vegnì cuntanschì grazia ad uraris da plazzals stagiunals en l'Engiadin'Ota sco er grazia a la coordinaziun stretga tranter il manaschi e l'infrastructura.
Tren d’autos fa minus e traffic da rauba resta stabil
Suenter l'onn da record 2024 haja il tren d’autos registrà ina reducziun da la svieuta ch’è 2,9% sut l'onn precedent. Il Pass dal Flüela che haja avert baud e er l’enviern miaivel hajan influenzà negativamain las frequenzas. En pli hajan custs pli auts per mantegniment e segirezza manà ad in resultat negativ da -0,2 milliuns francs. L'onn 2025 ha la Viafier retica transportà 543'000 autos tras il Vereina.
La svieuta tar il sectur da rauba è sa reducida per 4,3% sin 12,1 milliuns francs. Grazia ad optimaziuns dal manaschi e dal quint è tuttina sa resultà a la fin in plus dad 1,2 milliuns francs per il segment da rauba.
280 milliuns francs dal maun public
Cun 280,8 milliuns francs ha la Viafier retica survegnì l'onn passà 4,1% dapli daners dal maun public. Quellas sa resultan or da cunvegnas da prestaziun cun il chantun u cun la Confederaziun.
111,1 milliuns francs èn ids a favur dal traffic da persunas. 152,8 milliuns francs e cunquai la gronda cumpart, èn ids en l'infrastructura. Tut en tut ha la retica investì 293 milliuns francs en infrastructura e material rudlant.