Suenter plirs onns cun difficultads pervia dal dumber creschent da passagiers ed ina fulla da glieud durant l'emprima fin d’emna da december ha la Retica prendì mesiras sin il traject sur il Pass Bernina. Las mesiras principalas includan in augment da capacitad da 600 plazs supplementars per di, quai cun in tren regiunal e Bernina Express supplementar en omaduas direcziuns. Era in sistem da sclusas a Tirano e San Murezzan è vegnì installà. Quai per diriger il fluss da passagiers e passagieras cun parter la glieud en gruppas ch'han reservà ina plaz en il Bernina Express e quels ch'han in bigliet normal per il traject. Quellas mesiras èn però limitadas fin il cumenzament da schaner.
-
Bild 1 von 6. La zona da spetga a San Murezzan. Qua vegnan passagiers e passagieras senza reservaziun manads per evitar caos sin il perrun dal Bernina Express. Bildquelle: RTR.
-
Bild 2 von 6. Tavla d'infurmaziuns per sviar ils passagiers en la zona da spetgar. Bildquelle: RTR.
-
Bild 3 von 6. Curt avant che la glieud po entrar en il Bernina Express. Bildquelle: RTR.
-
Bild 4 von 6. Ils vaguns sco er las reservaziuns èn numeradas per dar orientaziun. Bildquelle: RTR.
-
Bild 5 von 6. Adrian Lombriser gida cun infurmaziuns. Bildquelle: RTR.
-
Bild 6 von 6. Bildquelle: RTR.
Las mesiras duain evitar caos
Per il gerant da la staziun a San Murezzan, Adrian Lombriser è l'emprima fin d'emna da december stada in mument, ch'ha avert ad el ils egls. Grazia a la bell'aura èn ils trens davent da Tirano stads emplenids uschè fitg che blers passagiers cun bigliets valabels han stuì star en pe u n’han betg pudì far il viadi enfin San Murezzan.
Nossa finamira è cun questas mesiras d'evitar trens plain stagnads sin il traject Tirano – San Murezzan.
Quai ha er dà reclamaziuns da la populaziun da la Val Puschlav. Indigens n'hajan betg pli chattà in plaz. La Viafier retica ha perquai stuì reagir.
Il plan per ils dis da festa
Las uras da punta prevesidas èn tranter las 7:00 e las 13:00 per Tirano e San Murezzan e tranter las 13:00 e las 18:00 per la direcziun cuntraria. Uschia duai girar mintga mes'ura in tren, per transportar uschè blera glieud sco pussaivel . Tenor Adrian Lombriser han las mesiras funcziunà. Ils passagiers e las passagieras cun ina reservaziun per il Bernina Express hajan chattà la ina plazza pajada. Ils auters viagiaturs e viagiaturas però, quels hajan mintgatant stuì spetgar il proxim tren.
Igl è difficil da plansiar, perquai che nus na savain betg, quanta glieud che vul far il traject per di. Jau pens, ch'era blera glieud è las proximas fin d'emnas da viadi tranter Tirano e San Murezzan
Ussa resta da guardar, sche las mesiras duain vegnir extendidas ils proxims mais.