En Svizra pateschan mintg'onn radund 50'000 uffants da violenza a chasa. In da 10 giuvenils è en il mument senza scolaziun e senza lavur. Per gidar a quels uffants ha la Chadaina da fortuna rimnà ier daners. Era RTR è sa participà. Tranter auter han ins pudì telefonar ad RTR e far ina donaziun via telefon.
Ina che prendeva giu quels telefons, era Denise Ryffel, la manadra da la Crusch cotschna Svizra dal Grischun. Ella ha ditg che la situaziun saja entras la pandemia vegnida mendra. Uschia ha la Crusch Cotschna sustegnì trais giadas uschè bleras famiglias sco ils onns avant.
Nus avain l’onn passà gì in record da dumondas d’agid.
La sfida
Denise Ryffel ha declarà, che la situaziun en il Grischun saja circa la medema sco en il rest da la Svizra. Ina gronda sfida saja d'insumma chattar e cuntanscher las persunas che dovran agid.
En Svizra è la paupradad bler en il zuppà, pervia che las persunas sa turpegian.
Integrar ils uffants e giuvenils
Era il president da la regenza grischuna, Mario Cavigelli ha prendì encunter donaziuns. Impurtant per el è, dad adina puspè persequitar quai tema e betg da laschar ir en emblidanza, be perquai che la problematica n’è forsa betg adina vesaivla en il mintgadi. In'auter aspect impurtant saja l'integraziun da quels uffants e giuvenils:
Integrar uffants ord famiglias cun paucs daners en uniuns, per exempel da ballape u skis. Uschia datti vastas pussaivladads da sa gidar.
