En il Grischun pretenda in'allianza da las fracziuns grondas in fond per cas da direzza, per pertutgads che tiran la curta tar ils pachets d'agid actuals da chantun e Confederaziun. Quai analog ad auters chantuns, hai num en la communicaziun communabla da la PBD, la PCD e la PS.
I sa mussia ch'ils basegns da blers independents, surtut manaschis pitschens, na sajan anc betg cuverts dals pachets d'agid naziunals e chantunals. Per ils pertutgads na saja l'agid da liquiditad sin basa da credits nagina schliaziun e portian a lunga vista crisas da debits. En pli hajan tschertins a la fin nagina autra pussaivladad che da sa drizzar als uffizis socials da las vischnancas.
La regenza grischuna stoppia perquai agir spert ed a favur da l'entira economia. La allianza da las fracziuns argumentescha sia pretensiun cun il fatg, ch'il chantun saja en ina buna situaziun finanziala. Durant ils ultims onns haja quel mintgamai pudì realisar in surpli. Da l'ultim quint annual resultia in surpli da 115,5 milliuns francs. La regenza duaja metter a disposiziun ina cumpart da quest surpli per in fond per cas da direzza.
Sco cusseglier guvernativ Marcus Caduff conferma, saja la regenza gia vid ponderar schliaziuns per ils cass pertutgads.
