RTR ha retschertgà tar 6 grondas societads d’aczias grischunas, co ch’i stat cun dividendas e lavur curta.
Repower vul pajar dividenda da 2,50 francs
Dals radund 550 collavuraturs da Repower èn 150 collavuraturs en lavur curta. Tuttina less Repower pajar ora dividendas als acziunaris. Ils 20 da matg decida la radunanza generala. Il curs da l’aczia da Repower sa mova en las ultimas emnas tranter 80 e 90 francs. Il cussegl d’administraziun propona ina dividenda da 2,50 francs.
Per il solit suondan ils acziunaris il cussegl d’administraziun. Quest onn sa splega la radunanza generala pervi dal coronavirus senza ils acziunaris. Sulet intgins paucs represchentants pon vuschar.
Naginas indicaziuns da Trumpf
La Trumpf Schweiz SA ha radund 600 collavuraturs – per gronda part a Grüsch – e quels èn en media per 25% en lavur curta. L'interpresa haja pli paucas empustaziuns ch’avant la crisa da corona, cunzunt en la producziun da maschinas, di Tobias Unger, commember da gestiun.
Entant che Trumpf dat gugent pled e fatg davart la situaziun en temp da corona, refusan ins dad inditgar l’autezza da las dividendas.
Würth a Cuira na tradescha nagut
Era la Würth a Cuira na sa lascha puncto dividendas betg guardar en las cartas. Ella refusa perfin dad dir quants collavuraturs che sa chattan da preschent en lavur curta en ses differents manaschis.
Trais grondas interpresas senza lavur curta
Obligadas da publitgar lur dividendas e lur quints annuals èn sulet las grondas societad d’aczias – respectiv quellas ch’èn quotadas a la bursa. Tar lezzas tutgan en il Grischun la Ems-Chemie e la Banca Chantunala Grischuna. Ellas n’han omaduas betg annunzià lavur curta.
La Banca Chantunala Grischuna ha distribuì quest’onn dividendas da 46 francs per il 2019. La Ems-Chemie decida il fanadur.
Nus quintain schon cun ina dividenda, pertge ch'il 2019 è stà in bun onn.
La Hamilton è cun passa 1'400 collavuraturs a Panaduz e Domat la pli gronda patruna privata en il Grischun. Ella ha da preschent che marscha bain cun sia purschida da tecnica medicinala e n’ha betg stuì annunziar lavur curta.
Damai che la Hamilton n'è betg quotada a la bursa, na fa l’interpresa naginas indicaziuns davart dividendas e svieutas annualas.