Siglir tar il cuntegn

Header

In uffant malsaun.
Legenda: Star en letg e baiver té cura ch'ins ha la grippa. Keystone.
cuntegn

Grippa tar uffants Cura che l'uffant pitschen sa senta mal

In uffant pitschen na sa betg dir als geniturs sch'el ha fevra u schizunt la grippa. Uschia n'èsi betg adina simpel per ils geniturs da reagir endretg. La media da chasa e vicepresidenta dals medis dal Grischun Edith Oechslin dat cussegl.

Per uffants cun lur sistem d'immunitad pli flaivel sa la grippa esser in grond obstachel. Dentant co san ins atgnamain chattar ora sch'in pop pitschen ha la fevra? I dat indizis. Edith Oechslin declera: «In uffant pitschen ch’è malsauns na po betg pli baiver, magliar u durmir.»

Liquids en il corp

Ils liquids en il corp èn essenzials durant il temp da grippa. I po dentant esser ch’in uffant na sa tragutter nagut pli perquai ch’el ha mal il culiez. Alura èsi impurtant da schliar quest problem cun medicaments u cun faschas bletschas dad ischi e tschagula. I sa dentant era esser il cas che l'uffant ha la diarrea e perda sin questa via memia blera aua. Lura cusseglia Edith Oechslin da dar in zichel aua cun pauc sal, per ch’el na perda betg anc dapli. In buglion sa en quest mument era avair in effect positiv. Sche quai na gida nagut, gidan forsa medicaments, sco per exempel tablettas e sirups sin basa da paracetamol.

Nutriment per meglierament

Igl è impurtant che l'uffant baiva avunda. Quai gida sin la via dal meglierament. Vinavant duess ins era mirar ch’el maglia. Edith Oechslin di che tgi che po magliar e baiver avunda è sin buna via da meglierament ed è puspè pli spert fit.

RR actualitad 07:00