Siglir tar il cuntegn

Header

cuntegn

Votaziuns communalas Iniziativas, midadas da leschas e credits

Qua chattais ina selecziun da projects da votaziun a nivel communal. Questa survista vegn actualisada permanentamain.

  • Vopna Mustér.
    Legenda: Mustér RTR

    Mustér

    Il center da sport e cultura, Center Fontauna, ch'è vegnì en ils onns duai vegnir engrondì, amplifitgà e modernisà. L'emprima etappa prevesa custs da 10,6 milliuns francs. La vischnanca surpigliass 8,7 milliuns francs e davart quel credit sto il suveran decider. Per la segunda etappa vegn quintà cun bun 3,5 milliuns francs.

  • Vopna Zernez.
    Legenda: Zernez RTR

    Zernez

    La vischnanca Zernez propona d’abolir l’obligaziun da stuair eleger commembras e commembers dal cussegl communal e dal cussegl da scola ord mintga fracziun singula. Cunquai ch’i sa tracta da midadas en la constituziun e leschas dovri ina votaziun a l’urna. Il suveran duai approvar la revisiun parziala da la constituziun, da la lescha da votaziun ed elecziun sco er da la lescha (nova) da scola. –– Plinavant decidan votantas e votants davart la revisiun parziala da la lescha d’impostas e da la lescha da pumpiers.

  • Vopna Scuol
    Legenda: Scuol RTR

    Scuol

    Il suveran da Scuol decida davart ina lescha da parcar. Quella lescha prevesa ch’ins po parcar pli lunsch davent dals centers pli ditg ed er pli favuraivel. Questa lescha è necessaria cunquai che las duas fracziuns Ftan e Tarasp n’han anc nagina tala lescha. –– Lura sto il suveran da Scuol er decider davart la lescha da taxas da construcziun. Er quella votaziun è necessaria, cunquai che be Scuol ha enfin uss ina tala lescha. –– La finala sto la vischnanca adattar sia lescha da taglia per ch’ella na cuntrafetschia betg a la lescha chantunala.

  • Vopna Claustra-Serneus.
    Legenda: Claustra-Serneus RTR

    Claustra-Serneus

    Tranter auter decidan votantas e votantas da la vischnanca Claustra-Serneus davart il num da la vischnanca. Tenor ina moziun inoltrada avant quatter onns duai la vischnanca sa numnar il futur mo pli «Claustra» e stritgar «Serneus», quai per avair in num pli simpel e per esser gist cun la fracziun Saas.

  • Vopna Schiers.
    Legenda: Schiers RTR

    Schiers

    Ils da Schiers han la schelta: Duai la vischnanca cumprar enavos la parcella «unterem Bahnhof» per 1,8 milliuns francs ubain spetgar anc trais onns? I va per terren industrial che la vischnanca aveva vendì avant tschintg onns ad ina cuminanza d'interess per realisar in parc da mastergn. Damai ch'i n'è enfin oz betg vegnì bajegià, ha la vischnanca uss il dretg da cumprar enavos la parzella - quai propona almain la suprastanza communala. Ina cuntraproposta vul dar dapli temp a la cuminanza d'interess per tuttina anc persvader investurs.

  • Vopna Flem.
    Legenda: Flem RTR

    Flem

    La chasa da tgira e dimora Plaids a Flem duai vegnir engrondida cun 15 ulteriuras abitaziuns per persunas pli passadas. Per far quai dovri ina midada en il plan da zonas. Ina gronda part da l’areal sin il qual la surbajegiada sa chatta sto vegnir messa en la zona per edifizis publics. Il suveran sto cunquai decider davart la revisiun dal plan da zonas. Per la vischnanca na datti nagins custs, cunquai che la fundaziun da la chasa da dimora e tgira Plaids surpiglia tut ils custs. –– Plinavant vul la vischnanca da Flem cumprar per 2,36 milliuns francs la parcella cun il bajetg da la posta Flem/Waldhaus. La finamira è da rinforzar uschia il potenzial turistic dal lieu e prevegnir ad ina surbajegiada massiva.

  • Vopna Tavau.
    Legenda: Tavau RTR

    Tavau

    A Tavau vul ina iniziativa restrenscher fieus artifizials en vischnanca. Vegniss l'iniziativa approvada fissan fieus artifizials pitschens cun sbrinzla, vulcans etc. bain anc lubids. Fieus artifizials gronds dessi dentant be tar occurrenzas da muntada surregiunala e la suprastanza communala stuess lubir ils fieus artifizials gronds. –– Plinavant decidan ils da Tavau davart ina segunda iniziativa. Quella vul ch’i dat dapli abitaziuns pajablas en vischnanca. En almain in lieu central duai la vischnanca porscher abitaziuns cun tschains da locuziun che sa basan sin ils custs.

  • Vopna Glion.
    Legenda: Glion RTR

    Glion

    Per che la GRegio Energie SA po realisar in'ovra electrica da biomassa, inclusiv ovra da pelletar ed implant da setgentar, sto ina parcella da la zona da guaud vegnir midada en ina da commerzi. L’ovra fiss la segund gronda da quest gener en il Grischun. A l'urna sto il suveran da Glion approvar la revisiun parziala da la planisaziun locala Crappa Grossa.

  • Vopna Arosa
    Legenda: Arosa RTR

    Arosa

    Arosa decida davart ina nova taxa d'alloschament ed ina taxa per promover il turissem. Quellas duain vegnir unifitgadas per l'entira vischnanca. L'onn 2015 aveva il suveran anc refusà ina revisiun da la lescha per il turissem.

  • Vopna Roveredo.
    Legenda: Roveredo rtr

    Roveredo

    Il suveran da Roveredo sto decider davart in credit per restabilir la via forestala da Roveredo a Monti di Laura, sin la spunda sanestra da la Val Mesolcina per 8,75 milliuns francs. La via ha ina lunghezza da 10,5 kilometers e maina sur territori da la vischnanca Roveredo e da San Vittore. L’ultima giada è la via vegnida asfaltada ils onns 1960. Plinavant sto il suveran approvar novas prescripziuns da traffic.

  • Vopna Trimmis.
    Legenda: Trimmis RTR

    Trimmis

    Votantas e votants da Trimmis ston decider a l’urna davart dus credits da bunamain 4 milliuns francs. In credit da 2,5 milliuns francs è previs per remplazzar il stgaudament da zinslas e per eventualmain schlargiar la rait da chalur a distanza. Cun la dumonda d’in segund credit da radund 1,4 milliuns francs vul la vischnanca realisar in areal da parcadis per lung da la via Montalin tar l’areal da scola.

  • Vopna Val.
    Legenda: Val RTR

    Val

    La zona d'explotaziun duai vegnir extendida cunquai ch'i ha duvrà in nov concept per pudair explotar la crappa. Quel resguarda la segirezza dal persunal e da la via chantunala.

Elecziuns

En las vischnancas grischunas n'èsi betg mo da votar, mabain savens era d'eleger las autoritads communalas. Qua ina survista:

Dossier online rtr.ch/votaziuns

Dossier online rtr.ch/votaziuns

Sin in clic tut las fatschentas federalas e communalas.

RTR votaziuns 2020

Artitgels legids il pli savens

Scrollar a sanestra Scrollar a dretga