Cun Ursulina Cadruvi ha la chasa d'attempads a Lumnezia chattà ina persuna cun blera experientscha per il post da manadra. Dapi bunamain diesch onns ha ella manà in'instituziun sumeglianta – numnadamain la gruppa d'abitar da tgira «Höfli» ad Altdorf. Quai scriva il Cussegl da fundaziun dal «Da Casa Val Lumnezia». Ella surpiglia il post a partir da l’onn che vegn.
Ursulina Cadruvi è oriundamain da Ruschein. Sper sia experientscha sco manadra ha ella era ina scolaziun da tgira. La mainafatschenta actuala, Ruth Lichtensteiger, ha gì surpiglià la batgetta da «Da Casa Val Lumnezia» l'october 2020 per interim – quai suenter ch'igl aveva dà svaris en la direcziun. Supplementarmain ha Lichtensteiger era gì surpiglià il post sco manadra da la tgira a partir da l'entschatta 2021. Lezza plazza occupescha a partir da quest november Esther Soliva. En pli ha «Da Casa Val Lumnezia» pudì occupar trais ulteriuras plazzas da cader.
Virivaris en la direcziun da la chasa da tgira
En la chasa da tgira a Vella avevi dà il 2020 differenzas persunalas betg surmuntablas. Pervia da quellas ha la manadra da la tgira la finala gì abditgà sia plazza. Il medem mument era il manader vegnì scrit malsaun. Omadus posts han sinaquai stuì vegnir manads ad interim d'autras persunas. Uss han la direcziun dal «Da Casa Val Lumnezia» pia pudì occupar omadus posts cun successuras definitivas.
Or da l'archiv:
