Il chantun Grischun ha ina pluna datas, saja quai davart il dumber da la populaziun, cunfinaris, sanadad, turissem ed economia, zonas da bajegiar ed auter pli. Quellas datas dovra il chantun per tegnair la survista. Ellas èn dentant er interessantas per la perscrutaziun u per l'economia. Perquai ha il chantun Grischun lantschà il portal data.gr.ch.
Sin il portal vul il chantun metter a disposiziun a mintgina e mintgin las datas administrativas publicas. Cun publitgar las datas vul il chantun per l'ina stgaffir transparenza e crear ina basa per discussiuns e decisiuns. Per l'autra duain las datas pussibilitar projects innovativs en l'economia e la perscrutaziun. In ulteriur avantatg: Cun in lieu central per las datas na vegnan las datas da mintga uffizi betg arcunadas separadamain.
Per amaturs da statistica Grischuna
Sper las datas sezzas porscha la plattafurma er differentas funcziuns per visualisar las datas. Uschia duessi esser simpel da crear cartas u diagrams. Plinavant publitgescha il chantun sez adina puspè cuntegns ord sias datas. Per la plattafurma ha il chantun engaschà duas persunas cun plazzas cumplainas. Plinavant custa la licenza da la plattafurma 30'000 francs.
Cumplettar cuntinuadamain
Actualmain porscha la plattafurma 24 sets da datas da dus uffizis. Quai è anc fitg pauc. Sco congual: L'Uffizi federal da statistica ha be davart il tema «populaziun e societad» passa 1'100 statisticas. Sco ch'il chantun scriva, duai la plattafurma dentant vegnida cumplettada cuntinuadamain. La banca da datas data.gr.ch fa part da la strategia d'administraziun digitala 2024-2028 dal Grischun.
Adattà al tema
«Crai be vid quella statistica che ti has sez sfalsifitgar». Quella frasa enconuschenta audan ins savens. «La show» ha dà in sguard sin quella frasa e sia muntada e ha dà in curs cumpact davart il tema statistica.