La Confederaziun recumonda da stgaudar pli pauc l'abitaziun per spargnar energia. Sco effect secundar pon ins gist er anc spargnar raps u n'ha almain betg custs bler pli auts la fin dals quints. En teoria tuna quai logic, en la pratica n'è quai dentant betg uschè simpel.
Calculaziun da custs da stgaudament
Ina gronda part da la populaziun abitescha en ina chasa da pliras famiglias. En chasas modernas vegnan ils custs da stgaudar quintads tenor diever individual – «jau paj quai che jau dovr.»
La varianta la pli usitada è da pajar ils custs da stgaudar a conto. Vul dir, mintga mais vegn pajà ina summa fixa. Suenter la perioda da stgaudar survegn il locatari il rendaquint dal locatur u da l'administratur d'immobiglias per il consum «effectiv» e sto pajar la differenza ubain survegn enavos quai ch'el ha pajà memia bler.
Era en ina chasa da pliras famiglias nua ch'i na dat nagins quintaders individuals per stgaudar funcziunescha quai da princip uschia. En quest cas na pon ils custs dal rendaquint da stgaudar dentant betg vegnir calculads tenor diever individual. Perquai as dovra ina clav da repartiziun dals custs. Il pli usità è da quintar ils custs da stgaudar tenor grondezza da l'abitaziun per meters quadrats ubain meters cubics.
In exempel
Ina chasa da pliras famiglias, tuttas abitaziuns èn medem grondas, ils custs da stgaudar vegnan calculads per meter quadrat. La fin da la perioda da stgaudar datti ina summa entira per l’immobiglia. Quella vegn partida en medem grondas parts sin tuttas abitaziuns perquai che quellas èn medem grondas. Pia pajan tut ils locataris precis medem bler.
Sch'ils custs da stgaudar vegnan pia calculads tenor ina clav da repartiziun paj jau per in tant era per mes vischins. Era sche quels stgaudan quasi da fanestra ora. E qua na possian ins er betg far bler, di Thomas Schwager da l'associaziun da locataris da la Svizra Orientala. Ins po sulettamain empruvar da discurrer cun ils vischins e far attent els sin la tematica da spargnar energia.
