Prognosas da l'institut KOF da la Scola politecnica federala mussan che la Svizra spetga 10% damain giasts da l'Asia questa stad. Motiv è la guerra en l'Iran che ha differentas consequenzas sin l'Europa. Quants giasts pli pauc che vegnan en Grischun saja grev da dir. Ma en general fan il turissem e la hotellaria quint cun ina buna stad – cun pli paucs giasts da l'Asia e dapli da l'Europa.
Il turissem saja ina branscha che reagescha spert sin inquietezza internaziunala, quai ha il president da Grischun Vacanzas, Jürg Schmid, era puspè percurschì en quest cas.
Cura che questa guerra ha cumenzà hai direct dà in stop da cudeschaziuns. Ins ha badà ina malsegirezza, lura anc la mancanza da cherosin – quai ha chschunà ch'ils giasts han cudeschà a curta vista.
En la statistica saja da vesair che las pernottaziuns sajan idas enavos la segunda mesadad dal mars e l'avrigl. Ernst Wyrsch, il president da Hotellerie Suisse Grischun, discurra perfin d'in avrigl miserabel. El declera quai cun il sentiment da malsegirezza ch'ils giasts han.
Sper il sentiment datti dentant era fatgs: per exempel èn puncts centrals dal traffic aviatic sco Dubai limitads – uschia ch'igl è da chattar alternativas u sviar. En pli creschan ils pretschs da cherosin ed airlines stritgan sgols. Ils sgols ed il plazs en ils aviuns èn pia stgars e procuran per pretschs che creschan.
Igl è però betg be uschia che giasts da l'Asia na vegnan betg en Svizra ed en il Grischun, er viceversa: glieud da l'Europa viagia pli pauc en direcziun ost.
Sch'igl èn 50 grads a la Mar Mediterrana vegnan blers giasts perquai ch'els vulan passantar notgs frestgas. Jau sun plain fidanza per la stad – las prognosas èn in zic pli bassas ma quai po sa midar mintg'emna.
Tenor Jürg Schmid haja quai in avantatg perquai che persunas da la Svizra vegnan tranter auter en Grischun en vacanzas. E las persunas svizras fan ora ina gronda part. Ed Ernst Wyrsch agiunta che sco uschia savens en questa branscha, gioga era questa stad l'aura ina gronda rolla.