«Die Eiskönigin» – in roman criminal che gioga en Engiadin'Ota sin la Fuorcla Surlej ch'è vegnì publitgà l'onn 1920. Tenor il scienzià ed autur Thomas Barfuss è quai l'emprim roman criminal che gioga en il Grischun. El è dentant vegnì scrit d'in autur ollandais.
Il crimi regiunal è daventà in model da fatschenta
Curtas istorgias u serias criminalas – quel gener para da funcziunar. «Il crimi regiunal è daventà in model da fatschenta», di Thomas Barfuss. «I dat chasas edituras che mettan mintg'onn 60, 70 crimis sin il martgà.»
El ha scrit sez in cudesch, precis davart quest tema. «Mordslandschaften» (2024). En quest cudesch emprova el da respunder la dumonda, pertge che istorgias criminalas e mazzaments fictivs fascineschan ils umans. Quai na saja betg ina simpla dumonda per respunder, di l'um da 63 onns.
Igl è in gener che va fitg damanaivel – la culissa è reconuschibla, i gioga en nossa regiun. Quai è natiralmain captivant.
Che la fascinaziun cun il crimi saja ozendi uschè auta, haja dentant anc in auter motiv. «Sch'i dat ina malsegirezza en la societad, s'avanza il crimi adina spezialmain lunsch ordavant», declara el. «Il crimi sclerescha gea in crim – quai vul dir ch'el porta enavos urden.»
En ses cudesch discurra el mo da crimis fictivs – mintgatant inspirads da fatgs reals, però cun figuras ed istorgias inventadas.
Il gender criminal è daventà ina atgna branscha da fatschenta – hotels e chasas edituras dattan l'incumbensa per cudeschs criminals che giogan en il Grischun. Là vesa Thomas Barfuss il connex tanter in turist che fa vacanzas en ina regiun muntagnarda ed ina detectiva, che sto sclerir in murdraretsch.
Il detectiv sco era la turista vulan savair, co ch'i guarda ora davo las culissas – davos las culissas d'in lieu turistic u davos las culissas d'in murdraretsch.
Uschia s'uneschan en quests romans criminals ficziun e realitad in cun l'auter – saja quai en l'iert da la Bretagne u en las muntognas da l'Engiadina. Il Grischun para da porscher avunda lieus idillics, per anc dapli istorgias e romans criminals en l'avegnir.