Dapli ch’il di dals Trais Retgs è passà, è la citad e la IBC londervi da demontar tut la decoraziun e las glischs da Nadal ch’eran scumpartids a Cuira. Per ch’els possian far questa lavur en ruaus e senza che glieud è en via cumenzan els gia la damaun baud, enturn las 5:30. Il termometer mussa minus otg grads, a Cuira vegn tiers il vent ed ils radis dal sulegl na rivan betg tras las giassas.
Pervi da quai s’ha Francesco Grandinetti tratg en chaud: soccas grossas, chautschas suten lungas, chautschas da lavur, t-shirt, pullover da termo, pullover, giacca, schal e guants. Malgrà tut questas vettas smatga la fradaglia atras. Ses collega da lavur, Kurt Grossmann ha en medem bleras vettas. El ha dentant adina fraid ils mauns.
Il mender èn ils mauns. Pertge i na dat betg guants che dattan chaud e ch’èn buns per lavurar. Ma senza guants na pudess ins gnanc lavurar tar questas temperaturas – qua ta schelass giu la detta.
E betg mo ils dus lavurants han fraid, mabain er ils cabels e las chadainas da glischs che pendan dapi la fin da november dadora. Pervi da quai vegnan tut ils cabels deponids en ina halla stgaudada enfin ch’els n'èn betg pli dirs e van d'enrullar e dustar. Tenor dumber e via, uschia ch’els èn pronts per l'onn proxim.
Quantas glischs d’advent che la IBC ha mess si en tut la citad na sappia Francesco Grandinetti betg – tenor el sajan quai bleras. Mo schon la planta da mammut che stat en il parc da Fontana vegn illuminada da chadainas da glischs da tschintg kilometers lunghezza. Quests cabels restan tut onn sin la planta e glischa durant il temp d’advent.