Apaina che quella decoraziun sgarschaivla da Halloween era davent, ha Przemyslaw Molski gia puspè cumenzà cun ses proxim project. El n'ha betg ditg manzegnas cur ch'el ha ditg ch'el veglia decorar la chasa era per Nadal.
Ussa traglischa sia chasa. I dat umens da naiv, cullas glischantas, lollies e bunbuns cotschens ed alvs, in tschierv che sprinzla sco in cristal ed in enorm rumpanuschs. E sch'ins entra la chasa è era tut decorà: en mintga chantun as chatta ina decoraziun da Nadal.
Ina gronda part da quella decoraziun festiva ha l'om da 35 onns fatg sez. Betg tut funcziuna adina immediat. Mintgatant dovra el pliras emprovas fin ch'insatge guarda ora bain. Ma dar si n'è mai in'opziun.
Jau hai lavurà cun lain, bleras decoraziuns èn effectiv natiral e regiunal. Intginas chaussas ha jau schizunt stampè cun mes squitschader da 3D
Las ideas per quella decoraziun extraordinaria chatta el savens en l'internet. Era films americans dattan ad el adina puspè inspiraziuns.
-
Bild 1 von 5. Cun il squitschader da 3D fa Przemyslaw Molski differentas decoraziuns, tranter auter er cullas da Nadal. Bildquelle: RTR.
-
Bild 2 von 5. Bildquelle: RTR.
-
Bild 3 von 5. Bildquelle: RTR.
-
Bild 4 von 5. Bildquelle: RTR.
-
Bild 5 von 5. Bildquelle: RTR.
Sustegn da visavi
Cun Halloween han ils vischins dal Polac, Renatus Balett e sia dunna, betg pudì cumenzar bler. Ma els han spert badà che lur vischin ha ina pli gronda missiun. Perquai han els questa giada gidà cun construir, installar e plazzar las decoraziuns da Nadal. Renatus Balett è falegnam ed ha uschia pudì dar in u l'auter tip. Il vischins han er mess a disposiziun ina part da lur chasa.
La saira cura ch'ins vegn a chasa e vesa quels anghels, las chandailas e las glischs e cura ch'ins vesa che tut è decorà – quai fa segir plaschair.
Betg mo Przemyslaw Molski e ses vischins han plaschair. Sch'i vegn stgir en la vischnanca da Breil e las figuras cumenzan finalmain a brigliar, ferman adina puspè persunas en la via San Giacun per sa smirvegliar e rir.
Per Przemyslaw Molski è cler: l'onn proxim vuless el decorar anc dapli ed anc pli bel.