Avair influenza a Berna, quai vul il Center er en l'avegnir. Perquai vul il president dal Center grischun Kevin Brunold far tut per ch'il sez resta er suenter l'era Engler en mauns dal Center. «Nus dastgain gia occupar quel relativamain ditg, adina cun fitg fermas persunalitads. E nus vegnin a guardar co che nus pudain tegnair quel.»
Per in'ulteriura legislatura vuless gugent l'auter cusseglier dals chantuns dal Grischun, Martin Schmid, sa metter a disposiziun. Quai prendì il cas che la Partida liberaldemocratica trametta anc ina giada el en cursa. Dapi 15 onns furman Schmid ed Engler il tandem burgais per il Grischun en la Chombra pitschna.
Nagin Na da Candinas e Caduff
Dapi 15 onns sesa Martin Candinas gia en il Cussegl naziunal, il 2023 ha el presidià la Chombra gronda. Ha el mustgas da midar en il Cussegl dals chantuns? Candinas na renviescha betg, di dentant che quai saja ina decisiun da la partida e la finala dal pievel grischun tgi ch'el vul a Berna.
Mia finamira è da pudair cuntinuar cun mia lavur a Berna, saja quai en il Cussegl naziunal u tut tenor en il Cussegl dals chantuns.
En Chasa federala sa metta pia Martin Candinas en posiziun, ma er a Cuira datti nums che pudessan succeder a Stefan Engler. Uschia per exempel Marcus Caduff e Carmelia Maissen ch'èn actualmain en la regenza grischuna. La cussegliera guvernativa dat dentant in chanaster, ella na prenda betg en mira il mandat a Berna.
Quella dumonda sa tschenta il mument betg per mai. Jau avess grond plaschair da dastgar cuntinuar mia lavur sco cussegliera guvernativa.
Prioritad ha la reelecziun en la regenza er per Marcus Caduff. Il Lumnezian di ch'el na saja enfin uss betg s'occupà pli a profund da questa dumonda. Ma el ha er gia signalisà che politisar a Berna fiss insatge che cutizzass el.
Sche la situaziun vegn uss pli concreta, lura èsi da valitar quai danovamain e far ponderaziuns davart quest tema.
In Na tunass auter, in Gea dal cusseglier guvernativ n'èsi però er betg anc. Candinas e Caduff pia dus candidats pussaivels. Il cumbat è cunquai lantschà e pudess tut tenor er chaschunar tensiuns aifer la partida.
Interess signaliseschan er la Partida populara dal Grischun ed ils socialdemocrats. Cura e cun tgi ch'i vulan ir en cursa per il sez en il Cussegl dals chantuns vulan las partidas decider pli tard. Quai han ils responsabels ditg sin dumonda da RTR. Las elecziuns èn l'atun 2027.
