L'Hotel Stern a Cuira è ina part fixa da la citad. Tant commerziants sco er uvestgs e schizunt general Henri Guisan han pernottà en ina da las 69 stanzas da l'hotel. La chasa da var 300 onns stat per tradiziun. Ina midada da directur n'è betg ina simpla chaussa, ha declerà l'anteriur directur Adrian Müller.
Toni Curdin Foppa è atgnamain ina soluziun ideala per mai.
Ussa han ins dentant chattà cun Toni Curdin Foppa il dretg. El ha fatg avant intgins onns l'emprendissadi sco cuschinier ed enconuscha bain l'hotel e sias valurs. Quai era fitg impurtant per Adrian Müller.
Per Toni Curdin Foppa sa serra cun quest pass in rudè. Suenter intgins onns returna el pia en l'Hotel Stern, nua ch'el ha lantschà sia carriera professiunala cun in emprendissadi sco cuschinier. Tranteren ha el fatg in num a Cuira sco gastronom ed interprendider.
Cumenzà ha tut cun in servetsch da transport ch'el ha surpiglià curt suenter l'emprendissadi. Ina part da quel maina el anc adina, ina part ha el vendì per investar en ses emprim local, il «Da Noi». Pli tard è lura vegnida vitiers la «Brasserie Süsswinkel» ed el ha fundà durant la pandemia da corona il restaurant cun servetsch da furniziun «Nayan» ch'el ha gia puspè vendì.
Ussa cun surpigliar l'Hotel Stern cumenza per el in nov chapitel. L'emprim hai num arrivar ina giada. El ha gia passentà bler temp cun il directur vertent, che ha declerà, mussà e scolà. Las proximas emnas vuless el dentant emprender dapli.
Jau vegn a preparar ensolver per ils giasts, gidar en cuschina u accumpagnar il portier da notg.
Suenter questa fasa vali dentant tuttina da purtar novs impuls al hotel. El vul mantegnair quai ch'è sa cumprovà, na vul dentant betg star airi. Il concept da las ustarias duai vegnir adattà, cun las chombras duai capitar insatge ed eventualmain pudessi bainbaud dar ina dependenza. I duai dar midadas, dentant adina cun respect da la chasa e da sia istorgia.
Toni Curdin Foppa è conscient da la gronda responsabladad. I na va betg mo per il bun num da l'hotel, mabain era per ils giasts e per las collavuraturas ed ils collavuraturs. El ha respect envers l'incumbensa, vesa dentant fidanza en l'avegnir sco quai ch'el di envers RTR.