Pervi da la mancanza da plievgia e malsognas hai dà miserablas raccoltas da cacau ils davos onns en la Costa d'Ivur e la Ghana – ils dus pajais africans ch'èn responsabels per la gronda part da la producziun mundiala da cacau. Las consequenzas da questa mancanza sa mussa en ils pretschs auts.
Ils chocolatiers dal Grischun na vulan dentant betg dar vinavant quest augment dal tuttafatg a lur clients. Tenor Regula Allamand-Maron, la mainafatschenta da la Chocolateria Maron a Cuira, han els mo auzà levet lur pretschs. Era auters acturs da questa branscha, sco per exempel Arthur Bühler da la «Zuckerbäckerei», medemamain a Cuira, conferman che lur adattaziuns da pretschs sajan stads fitg bufatgas.
Ed era sch'ils products èn il mument in zic pli chars: La glieud cumpra vinavant tschigulatta. Lur clientella sa movia dentant plitost en il segment da pretsch pli aut, analisescha Nicolaus Hauser, il directur da l'hotel, confisaria ed ustaria Hauser a Son Murezzan.
Nossa clientella è pli pauc sensibla sin pretschs auts.
Il futur daventa tschigulatta forsa adina pli fitg in product da luxus. Regula Allamand-Maron è dentant persvadida che la glieud vegn adina a consumar tschigulatta. Forsa dentant simplamain in zic pli pauc ed in zic pli conscient.
