Il 2024 aveva il parlament surdà questa incumbensa da la Partida socialdemocratica a la suprastanza da Cuira. Suenter ina discussiun en il parlament ha ina maioritad refusà cun 11 cunter 10 vuschs questa questa revisiun parziala da la constituziun che leva dar en l'avegnir il dretg da vuschar ed eleger a persunas estras.
I avess pertutgà persunas che han permiss C, pia la permissiun da domicil. Per insumma dastgair vuschar ed eleger avessan quellas persunas stuì esser dapli che 10 onns en Svizra ed ils ultims trais onns a Cuira.
Ultra da quai avessan las persunas stuì avair in attestat da bun deport, in contract da lavur u esser economicamain independents. Tar la lingua fiss vegnì pretendì il nivel A2 a bucca ed A1 en scrit. A Cuira fissan quai stadas passa 3’500 persunas dapli che avessan survegnì il dretg da decider tar decisiuns communalas.
Arguments
In argument da la vart sanestra è stà che persunas estras pajan lur impostas a Cuira e duessan pervi da quai er avair il dretg da discurrer cun e decider davart temas communals.
In argument cunter da la vart burgaisa e dretga è che questas persunas pudessan era far la via da prender il dretg da burgais.
In terz da las vischnancas grischunas ha il dretg da vuschar per persunas estras
34 da 100 vischnancas en Grischun han il dretg da vuschar ed eleger per persunas estras cun permiss da domicil. Quai èn per exempel Alvra, Panaduz, Bever, La Punt Chamues-ch, Scuol e Surses.
Era en autras vischnancas è quai vegnì discutà, dentant refusà, quai a Landquart, Tavau, San Murezzan e Domat.