La «lingia blaua» è ina ruta da guntgida, exclusivamain per ils da Domat. Uschia duain ils abitants e las abitantas pudair guntgir las colonnas ch'i dat durant Pasca. In dad els è Lucas Collenberg, il chanzlist da Domat. La gievgia avant Pasca ha el gì dus opziuns per rivar da Cuira a Domat. Ils emprims kilometers – da Cuira enfin la rundella da Favugn – ha era el stuì star en colonna. A partir da la rundella da Favugn enfin a Domat sin la via principala ha el gì stgars 14 minutas ed el è stà en colonna.
Per rivar sin la «Blue Line» sto Lucas Collenberg ir davent da la rundella ed ir intgins meters direcziun Favugn e suenter sut la via principala ora. Là stat ina dunna en montura neon-melna e scannescha il numer d'auto – il chanzlist ha in dals 2'500 permiss per la «Blue Line» e po passar. Sin questa via exclusiva dovra el dus minutas e mez per rivar a Domat. Pia ha el spargnà circa 12 minutas sin ils 1,6 kilometers.
Tenor el sa renda quai. Las abitantas ed abitants da Domat han gia da star en colonna enfin la rundella da Favugn, uschia che i fa bain da betg stuair star en la colonna per l'ultima part dal viadi a chasa.
Questa saira hai vairamain funcziunà bain. Tar il post da controlla èsi ì spert. Sch'i giess adina uschia alura fissan nus fitg cuntents cun quest project.
Ils proxims mais vegn la «lingia blaua» mess en funcziun cura ch'i dat bler traffic. L'atun da quest onn vulan ins lura trair bilantscha.
Pertge ch'i dovra la via exclusiva
La «lingia blaua» è ina reacziun sin ina problematica acuta per ils abitants da Domat, di il president communal Erich Kohler. La lavina da traffic da guntgir las colonnas vers sid sin l’autostrada A13 na blocheschia betg mo la via chantunala, mabain er la via dals quartiers.
Igl haja dà intginas situaziuns scurrilas ch’è hajan fatg scurlar el la testa. Ina situaziun ch'è stada en memoria al president communal è stà in turist che saja stà a mesa via en in quartier da Domat cun ses tgar annex chargià cun in aviun senza motor. Quai tuni divertent, na saja dentant betg.
La vita publica stat salda – ed il toffa als da Domat. Sche er las vias da quartier èn bloccadas patescha la segirtad e la qualitad da vita.
Radund 2'500 persunas han dumandà in permiss per la «lingia blaua» tar la vischnanca. La ruta alternativa, exclusivamain per ils abitants e las abitantas da Domat, ils bus da Cuira e las organisaziuns da glisch blaua, che duess permetter, da guntgir las colonnas sin la via principala tranter Cuira e Domat.
Sin via a Domat è il tenor positiv ed ils dumandads fan diever da la purschida. La dumonda che resta è, sch'il effect vegnia propi ad esser uschè grond. Davent da Cuira – Sommerau fin la rundella a Favugn datti numnadamain nagina ruta alternativa. Uschia ch'igl è pussaivel ch'ins sto star en colonna da Cuira fin a Favugn.
Il president communal, Erich Kohler di, ch'ins stoppia uss ina giada rimnar experientschas cun la «lingia blaua» ed il sistem da dosar il traffic dal chantun. A Cuira – Sommerau vegnia il traffic dosà da l'Uffizi chantunal per vias, uschia ch'igl na duess betg dar lungas colonnas fin la rundella a Favugn. Ed er sch'igl duess dar colonnas da Cuira fin a Favugn, porschia la «lingia blaua» tuttina in'alternativa per la mesadad dal traject tranter Cuira e Domat.