Ina studenta ha survegnì in contract da practicum. Dentant, paucs dis avant ch'ella avess gì d'entschaiver, haja il patrun infurmà ch'ella na possia betg lavurar en quel lieu perquai ch'ella portia in faziel da chau.
Quai è mo in exempel che vegn descrit en il nov rapport da discriminaziun rassistica. Tenor il rapport èn l'onn passà vegnids annunziads 1'245 cas. Ils cas èn uschia sin in medem nivel sco l'onn avant cun 1'211 cas, analisescha Donat Albin. El è responsabel per il post da cussegliaziun cunter rassissem a Cuira.
En cumparegliaziun cun l'onn avant èn las annunzias da rassissem restadas sin il medem nivel.
Ils posts da cussegliaziun datti en tut la Svizra, ils chantuns èn obligads per porscher quels. Ils posts n'èn betg mo responsabels per cussegliaziun, ma era per infurmar e sustegnair. Lur purschida offra era mediaziun u intervenziuns, ed era cussegliaziun giuridica, pia ina gronda paletta da pussaivladads da gidar.
Il sectur da furmaziun è fermamain pertutgà
Las pli bleras annunzias èn vegnidas fatgas en il sectur da furmaziun, a la plazza da lavur u en connex cun la polizia. La discriminaziun cumpara savens en furma da dischavantatgs – sco l'exempel dal faziel da chau – u en furma da remartgas ed illustraziuns mulestusas. Ils motivs principals per la discriminaziun èn pel stgira (406) xenofobia en general (369), pia ina tenuta negativa envers esters, e l'appartegnientscha a l'islam (281).
Situaziun en il Grischun
En il Grischun èn victimas da rassissem savens persunas muslimas e persunas cun pel stgira. Bleras giadas capita la discriminaziun a la plazza da lavur u en connex cun vischins e vischinas, declera Donat Albin.
En nossa lavur da mintgadi vesain nus ch'il basegn per il post è schont avant maun. Jau sun detg segir che la cifra nunenconuschenta è bler pli auta ch'ils cas che nus avain.
L'onn passà èn tranter 12 e 15 persunas s'annunziadas tar il post da cussegliaziun a Cuira. Quai na munta dentant betg ch'i na dettia nagin rassissem en il Grischun, explitgescha il cussegliader da 35 onns.
Mancanza da persunal
Il post da cussegliaziun na saja betg visibel avunda, la reclama sco er la collavuraziun cun autras instituziuns manchian. Tenor Donat Albin na saja betg pussaivel da promover pli fitg il post da cussegliaziun perquai ch'els hajan mo 20% a disposiziun. Quai tanschia gist da far las cussegliaziuns dentant betg per bler dapli.
Strategia naziunala dat speranza
In zichel speranza fetschia dentant il fatg ch'il Cussegl federal haja il december passà lantschà ina strategia naziunala cunter rassissem, raquinta Donat Albin. Forsa che quella strategia possia gidar da giustifitgar dapli persunal e cun quai gidar da far il post da cussegliaziun pli visibel.