L'onn 1983 ha il Do it sco emprim martgà da construcziun insumma en il Grischun avert sias portas. Grazia al success hai sur ils onns dà ulteriuras filialas a Küblis, Punt Muragl ed a Zernez. Pervia da la concurrenza creschenta dals ultims onns serra la filiala a Cuira dentant l'entschetta matg, sco che l'interpresa ha communitgà.
Dapi che Jumbo e Landi èn arrivads en il Grischun, n'avain nus nagin monopol pli. Sco pitschna interpresa da famiglia n'avain nus nagina schanza da concurrer en puncto acquisiziun cun in concern grond sco Jumbo.
A Zernez saja la raschun per serrar dentant in'autra: là stuess numnadamain l'edifizi vegnir renovà a la gronda, e quests custs fissan uschè auts ch'i na rendess betg d'investir quels daners. Uschia serra questa filiala gia l'entschatta avrigl.
Fundà il Do it aveva Josias F. Gasser, pionier da l'ambient ed anteriur cusseglier naziunal. El è mort l'ultim atun, ils 9 d'october, en la vegliadetgna da 72 onns en consequenza d'ina sanganada dal tscharvè.
Il Do it saja per el adina stà in project da cor, di ses nev Georg Gasser. Quai haja er engrevgià la decisiun da serrar las duas filialas.
Nus avain discutà bler entaifer la famiglia. Noss giavisch da cor è cunzunt stà da segirar las plazzas da noss collavuraturs.
La gronda part dals collavuraturs pon salvar lur plazza
11 da las en tut 12 collavuraturas e collavuraturs da la filiala a Cuira vegnan a lavurar vinavant en la filiala a Küblis. Là haja numnadamain gì pliras plazzas libras e persunas ch'han lavurà dapli pertschients che quai che fiss stà fixà.
Fin ussa avain gì stretgas da persunal a Küblis.
A Zernez ha lavurà be ina persuna, lezza haja gia vulì da dar giu la plazza avant che la decisiun davart il futur dal lieu engiadinais saja crudada.
Il bajetg a Zernez vegn probablamain stgarpà giu – sin quest da Cuira spetga forsa anc in'autra incumbensa
Tenor Georg Gasser saja il bajetg a Zernez detg antiquà, plinavant avessan els gì da realisar pliras mesiras per ademplir las perscripziuns da la protecziun cunter incendis. Probabel vegnia il bajetg stgarpà giu, il terren nua ch'el stat tutgia ad ina persuna privata che veglia vender el.
Per il bajetg a Cuira dettia dentant differentas ideas – forsa dettia ina collavuraziun tranter la Gasser gruppa ed il locatari ch'è actualmain en la part sut da l'edifizi, la stizun da Bieler Sport.
Uschiglio dettia er plirs ulteriurs interessents che vulessan forsa fittar l'edifizi.
Sche nus stuain schon chalar, lura chalain cun il chau ad aut.
Ina chaussa che saja dentant gia clera: Georg Gasser veglia prender persunalmain cumià da las duas filialas che serran. E quai mintgamai cun ina festa nua ch'el veglia star davos il gril per dir grazia a la clientella cun mangiativas e cun ina baterlada. A Zernez vegn quai ad esser uschè lunsch ils 4 d'avrigl, a Cuira ils 2 da matg.