En general para d'ir bain cun las firmas Grischunas. Var trais quarts èn cuntents u fitg cuntents cun la situaziun actuala da la firma. Be 4% n'èn betg cuntents. Qua na sa mussan er betg grondas midadas en congual cun ils onns avant. In pau pli malsegir, dentant anc adina plitost positiv, vesi or tar il sguard vinavant. Cun ina situaziun pli nauscha quintan surtut fatschentas cun 10 fin 50 collavuraturs.
Gronda sfida: persunal qualifitgà
La pli gronda sfida vesan las fatschentas grischunas tar il persunal qualifitgà. Be tar 20% saja la mancanza da spezialistas e spezial ina pitschna sfida. Era sche quai èn levet dapli che pli baud, resta la tschertga da persunal ina sfida.
Per garantir en futur avunda persunal qualifitgà scoleschian las firmas vinavant lur agen persunal ubain ch'i augmentan il radius da tschertga – pia dapli glieud da pli lunsch davent. Gia uss è in terz da las firmas dumandadas dependent da cunfinarias e cunfinaris.
In'ulteriura sfida per firmas grischunas è il spazi. Concret ha in terz da las firmas dumandadas sfidas cun s'engrondir perquai che la plazza manca. 40% inditgescha ch'ins na chatta betg spazi d'abitar per il persunal. Sco pli gronda sfida en quest champ vesan las firmas lungas proceduras per la permissiun da construcziun.
Da las firmas dumandadas din var 40% ch'ellas n'exporteschan betg lur products. Tar 20% da las firmas fa l'export or dapli che la mesadad da la svieuta. Quai èn surtut las firmas grondas cun dapli che 250 collavuraturas. La retschertga mussa ch'en il sectur da l'export dettia malsegirezzas.
Adina dapli squitsch psichic
En media manca mintga collavuratur en Grischun durant 4,24 dis durant l'onn. Sco congual: Sin nivel naziunal è quella cifra tar 7,5 dis. Pitschnas firmas han pli darar da cumbatter cun persunal absent. 39% da las firmas hajan dentant registrà dapli absenzas pervia d'accidents u malsogna. Il motiv principal per quel augment sajan disturbis e squitsch psichic, sco per exempel spussada u sintoms da burnout. Mintga 5avla firma haja gia registrà in cas d'in disturbi psichic.