L'onn 2019 hai dà ina incumbensa da la fracziun da la partida sociala (PS) davart d'in plan d'acziun per l'egualitad tranter dunnas ed umens. Or da quella incumbensà è sa sviluppà il project «egual21» ch'è vegnì mess en pratica da l'administraziun chantunala.
Uss suenter tschitg onns ha quel project finì ed il chantun tira bilantscha.
Cumpatibilitad ed egualitad en il focus
Il project «egual21» ha cumenzà l'onn 2021 cun la finamira da promover specificamain l'egualitad e la cumpatibilitad da la professiun cun il temp liber e la famiglia. Cun ina metoda participativa han ins elavurà in plan d'acziun egualitad cun differents champs d'acziun, finamiras e mesiras concretas. Sin questa basa han las unitads administrativas realisà totalmain 324 activitads.
Latiers tutga per exempel ch'ils temas egualitad e cumpatibilitad da la professiun cun la vita privata èn oz ina part fixa dals discurs finals annuals da las collavuraturas e dals collavuraturs. Ultra da quai vegn il sistem da paja declerà a moda transparenta ed augments da paja vegnan communitgads a moda chapibla.
Ultra da quai han ins lantschà projects da pilot per augmentar l'atgna planisaziun e l'autoefficacitad da las collavuraturas e collavuraturs. Quai per exempel cun ina cundecisiun pli ferma en la planisaziun da lavur, congedis da paternitad pli lungs u sustegn finanzial per tgira d'uffants externa.
Ina bilantscha positiva
Uss suenter tschintg onns ha il post extern («UND») scrit in rapport d'evaluaziun, quel mussa in svilup positiv en tut ils secturs examinads. Per exempel è la cumpart da dunnas en l'administraziun chantunala s'augmentada dapi l'onn 2021 da 36 sin 40,2%. Plinavant èn vegnidas sviluppadas vinavant las cundiziuns generalas da l'organisaziun – per exempel en ils secturs da jobsharing, recrutaziun senza discriminaziuns ubain autonomia temporala e locala.
In auter punct surprendent è la distribuziun tranter umens e dunnas sch'i va per pensum. Anc adina lavuran bler dapli dunnas en temp parzial cumpareglia cun umens. Era ch'ins vesa in svilup en ils ultims 5 onns, è la differenza tuttina gronda.
En cumparegliaziun cun autras administraziuns communalas e chantunalas datti però anc in potenzial da meglieraziun. Per exempel èn las dunnas anc adina sutrepreschentadas, particularmain en posiziuns da cader.
Gist en las pli autas posiziuns da cader è la cumpart da dunnas anc adina fitg bassa. Jau pens che quai è ina incumbensa a lunga vista.
Ed i va vinavant
En l'avegnir vul ins sviluppar l'egualitad e la cumpatibilitad vinavant, quai en il rom da la strategia da las resursas umanas (RU). Quella strategia ha la finamira da sviluppar mesiras che sa basan sin il rapport d'evaluaziun da «UND» e d'integrar anc meglier en la cultura, en la direcziun, en ils process ed en il controlling, per garantir che las mesiras vegnan realisadas en tut ils uffizis e posts da servetsch.