La Partida populara dal Grischun ha pudì reconquistar ses segund sez che Heinz Brand aveva pers tar las elecziuns d'avant quatter onns. A partir da la sessiun d'enviern vegn la reeligida Magdalena Martullo-Blocher accumpagnada da ses collega Roman Hug en il Cussegl naziunal a Berna. Festivà quai è vegnì la dumengia saira a Cuira.
Cura ch'igl è vegnì enconuschent dumengia suentermezdi che la PPS dal Grischun va cun dus sezs, saja l'atmosfera en il local da festa l'emprim tuttina stada in pau malsegira, di la candidata Gabriella Binkert Becchetti da la Val Müstair. Ins n'haja betg vulì sa legrar memia baud. Avant quatter onns aveva il candidat Heinz Brand era fatg dapli vuschs che las da lezza giada nov-elegidas, ma tuttina betg savì mantegnair il sez.
Nus avain pensà che quai saja in sbagl en la calculaziun.
Ussa ch'il resultat è definitv lascha il segund sez da la PPS targlischar ils egls da las persunas preschentas.
Entant che Magdalena Martullo-Blocher e Roman Hug han bandunà la cumpagnia in mument per dar intervistas a las medias, vegn discurrì e discutà vi da las maisas lungas en la sala dal restaurant B12 a Cuira. E parallel vegn persequità sin ina gronda taila ch'è plazzada sin tribuna l'emissiun d'elecziuns da SRF.
Cura ch'i vegn annunzià il stan actual da la fermezza da partidas en il Cussegl naziunal vegni quiet en sala. Betg mo il plus da sezs da la PPS carmala in applaus, mabain era la perdita da sezs da la partida verda e verd-liberala.
Cura che las duas persunas principalas èn returnadas a lur festa vegnan ellas beneventadas cun embratschadas e gratulaziuns. Il recept da success vesa la reeligida Magdalena Martullo-Blocher en quai che la populaziun sappia sa fidar da las valurs da la partida dretga. Ella sa legra ch'ella saja betg pli suletta a Berna, di ella en ses pled avant las radund 50 preschentas e preschents. Ed er il nov-eligì Roman Hug è cuntent.
Ma avant ch'i va liber e ch'i vegn propi serius resta anc in pau temp da giudair l'atmosfera da festa.
