La serrada è stada sco in chametg ord tschiel avert. Ella ha surprendì tuts, davent dal persunal, la clientella e las autoritads communalas. Suenter dus onns cun cifras cotschnas parevi numnadamain da dar in nov cumenzament en stil grond ed in transferiment en il center da San Murezzan. Il 2021 avevan ils possessurs anc approvà investiziuns da milliuns per plans d’expander e renovar e per in’ulteriura purschida online. La lubientscha era valaivla per 20 onns.
30 persunas ston ir
Enturn 30 persunas ston vegnir relaschadas, sco il chantun ha confermà. Cunquai ch'i sa tracta dad ina relaschada da massa, è l'uffizi per industria, mastergn e lavur, curt KIGA, vegnida infurmada.
Nus avain udì che bleras da las persunas pertutgadas han gia ina soluziun da cuntinuaziun, dentant n'avain nus naginas cifras concretas.
San Murezzan perda cun quai ses casino, tge consequenzas che questa perdita ha ord vista da la vischnanca e l'organisaziun turistica n'è betg cler. La vischnanca da San Murezzan, sco er l'organisaziun turistica n'han betg vulì prender posiziun en chaussa.
