Avant 11 onns ha il bogn cuvert Ovaverva a San Murezzan festivà si’avertura. Dapi l’avrigl da quest onn è quel vegnì sanà cumplettamain. Donns vi dals batschigls e las isolaziuns han chaschunà che l’aua culava en tut las direcziuns ma na restava betg en ils batschigls.
Suenter circa 13 mais da sanaziun e lavurs dad ameglieraziun, duai il bogn Ovaverva a San Murezzan porscher sia purschida puspè a la populaziun. Tenor Ramiro Pedretti, il president da la cumissiun da sanaziun, èn las lavurs bainbaud finidas.
Custs da 12,5 milliuns francs
Prest suenter sia avertura dal 2016 s’han mussà differents defects en l’edifizi da l’Ovaverva. Surtut han ils bogns pers aua. Quai è vegni reparà uss cun novs batschigls d’atschal. Quai èn uss ils midaments pli visibels. Era è vegni sanà ils donns d’aua, che ils batschigls nunclaus han chaschunà. Ultra da quai è vegni renovà la part per uffants dal bogn ed era la part dal Spa ha retschavì in nov batschigl d’aua fraida. En tut ha la vischnanca dà liber in credit da 12,5 milliuns francs per las mesiras. Tenor Pedretti hajan pudì tegnair ils custs en il rom finanzial.
Nus essan cuntents ed in zic superbi, ch’igl è reussì a nus da finir las lavurs da sanaziun ed ameglieraziuns en il stretg spazi da temp.
Uschia po l’Ovaverva vegnir reavert sco planisà ils 8 da matg.
16 persunas dal persunal «vegl» lavuran puspè en l’Ovaverva
Suenter che l’Ovaverva aveva dà la disditga a tut il persunal dal bogn, han 16 persunas pertutgadas suttascrit in nov contract da lavur. Tut en tut basegna l’Ovaverva circa 40 plazzas da lavur che duain tenor Ramiro Pedretti esser occupads fin questa stad. Avant la reavertura ha la populaziun da San Murezzan guardà davos las culissas dal bogn sanà.
Tractativas giuridicas pendentas
Ils donns avevan ins constatà gia avant otg onns, be trais onns suenter l'avertura. Dispitas giuridicas davart las responsabladads e tgi che ha da surpigliar ils custs da sanaziun e l'elavuraziun dal concept da la sanaziun cumplexa han retardà las lavurs.
La vischnanca da San Murezzan aveva decis da surpigliar ina prestaziun preliminara per evitar consequenzas anc pli severas. Ils cas giuridics èn anc adina pendents. Oriundamain aveva il bogn custà passa 66 milliuns francs.
L'istorgia d'in bogn tant bramà
2013
Igl è curt avant l'avertura dal nov bogn Ovaverva a San Murezzan, i saja lung spetgà, perquai che las abitantas ed ils abitants da San Murezzan n'avevan betg in bogn cuvert durant bunamain 10 onns.
Per la construcziun nova aveva la vischnanca San Murezzan investì 66,59 milliuns francs. Quai è stà ina da las grondas investiziuns dapi blers onns.
2014
L'avertura dal bogn è stada in success. En il prim onn ha il bogn registrà circa 170'000 visitadras e visitaders che han fatg diever da la purschida dal bogn cuvert, spa e center da sport.
Il bogn e cunzunt il center da sport porscha lieu per trenar ad numerus atletas ed atlets d'elita. L'autezza da San Murezzan attira mintg'onn divers profis ed è uschia vegnì popular en il mund sportiv.
2020
Dispitaivlamain sto il bogn annunziar ina gronda sanaziun, e quai be sis onns suenter l'aventura. Il motiv èn donns uschè considerabels che l'aua cula or dals batschigls.
2023
Igl è cler ch'il bogn sto vegnir renovà ma fin che las lavurs entschaivan, passan puspè in pèr onns. La gronda dumonda che s'avra: Tgi paja?
2025
Las lavurs per la sanaziun cumenzan durant la stad.
2026
Il bogn Ovaverva festivescha sia reavertura.