Chalandamarz - Il Chalandamarz e sias tradiziuns culinaricas

Uschè different sco ch’il Chalandamarz vegn festivà en las singulas vischnancas, ha mintgina er si’atgna tradiziun culinarica. Entant che las inas vegnan enfin oz cuschinadas e mangiadas, èn autras periclitadas d’ir en emblidanza.

Guarda – il vitg d'Uorsin cun las chastognas classicas

Guarda è enconuschent pervia da l’istorgia d’Uorsin. Qua sa han Selina Chönz ed Alois Cariget numnadamain laschà inspirar pel cudesch d’uffants. Analog l’istorgia – datti er a Guarda enfin oz «Chastognas e latmilch» sco tratg da Chalandamarz.

Chastagnas da Guarda

Igl è in classicher – numnadamain è quest tratg dultsch in tratg ch’ins enconuscha en las bleras vischnancas.

Telesguard Spaisas da Chalandamarz: A Tschierv èsi la Ustrida da Lavin

News Durada 4 minutas 4 minutas

Guardar video sin Play SRF Streamar ussa

Puncts delicats

Per che las chastognas gartagian, èsi impurtant da chattar il gist mument dal luar il zutger e la latmilch ha da vegnir sbattida a maun e betg cun il mixer, tradescha Maria Morell.

Chapella – Patlaunas dattan energia

A S-chanf vegnan festivads duos dis Chalandamarz. Perquai èsi impurtant, ch’ils uffants survegnan ina buna marenda che dat energia. En la fracziun Chapella, prepara Ladina Heis mintg’onn var 300 patlaunas.

Patlaunas da Chapella

Mantegnair la tradiziun

Ella ha surprendì questa tradiziun chi’i dat dapi var 30 onns, per mantegnair ella.

Las patlaunas èn in tratg dultsch, che vegn fatg en l’ieli chaud. Decorà cun in zic zutger – gustan ellas a grond e pitschen.

Tschierv – L'ustrida da Lavin è arrivada en Val Müstair

L’ustrida è in tratg antic, ch’ins fascheva tranter auter a Lavin. La finiziun da l’emna da Chalandamarz era là numnadamain la festa da Cuvits, nua ch’ils novs commembers da la suprastanza communala èn vegnids saramentads.

Ustrida enconuschan mo paucs

Ida Toutsch sa regorda bain vi da la festa, nua che las mattas scumpartevan Ustrida a mintgin che aveva gust. Ella ha maridà a Tschierv ed uschia purtà il tratg dultsch en Val Müstair. Oz n’enconuschian però betg pli bler Ustrida – il tratg na vegn quasi be pli fatg per Chalandamarz.

Ustrida da Tschierv

Simpel ma bun

Ustrida è in tratg che vegn fatg cun paucas ingredienzas, ch’ins aveva pli baud adina en chasa. Brastular giutta en paintg chaud, caramelisar cun zutger e mel, laschar sfradar e giudair.

Ils recepts