Dapi il november da l’onn passà è la Taskforce «Corona II Engadin» activa en Engiadin’Ota. Stgaffida è ella vegnida da la destinaziun turistica da l’Engiadin’Ota.
Sco Andrea Gilli, il president da la Regiun Malögia, ha communitgà la gievgia a la conferenza da presidents, ha la gruppaziun uss inoltrà la dumonda d’in sustegn finanzial da las vischnancas da las Regiuns Malögia e Bernina. Quellas han da decider fin ils 15 da favrer davart in sustegn da total 43’500 francs.
La taskforce «Corona II Engadin» ha surpiglià la communicaziun davart la situaziun da corona per tut la regiun – ed è tenor Gilli fitg impurtanta.
