Dapi il 2021 è cler che la deponia per ruments da construcziun Sass Grand visavi la vischnanca da Bever en Engiadin’Ota duai vegnir sanada. Tenor il president da la cumissiun per la deponia e president communal da Zuoz, Romeo Cusini, ha la regiun Malögia sco possessura da Sass Grand elavurà ils ultims tschintg onns trais mesiras per che la deponia possia vegnir duvrada er anc suenter il 2027.
Trais mesiras cunter l’aua
Quai perquai che l’Uffizi da natira ed ambient dal Grischun ha dà be in permiss provisoric fin la fin dal 2027. Midà duain vegnir trais chaussas. Perquai che la deponia sa chatta sin ina scarpada, duai l’aua che vegn giu da la muntogna vegnir sviada davent cun in foss sin la lunghezza da la deponia.
Uschia duai l’aua che passa tras il material da construcziun vegnir controllada. L'aua contaminada duai uschia era vegnir separada. Per cuntanscher quai, duai il stgav planisà al pe da la deponia esser fin sis meters profund.
Per il mument n’avain nus betg registrà ina contaminaziun da l’aua che sorta da la deponia. Nus controllain regularmain al pe da la deponia.
Il foss duai uschia proteger l’aua da fund en las palids gist al pe da la deponia.
Betg segir sche la drenascha funcziuna
Sut ils mantuns existents da la deponia è gia uss en funcziun ina drenascha per l’aua da ruments da construcziun. Cun guardar sche quel funcziuna, n’han ins betg pudì controllar, sch'ils bischens èn anc entirs e funcziunan. Uschia duain era quels vegnir sanads.
Ils custs per las mesiras stima la cumissiun sin 4,5 milliuns francs. Suenter la submissiun e la dumonda da finanziar a las vischnancas da Malögia fin S-chanf, duain las lavurs per las mesiras cumenzar l'onn che vegn.