Josiane Imhasly ha studegià sociologia e scienzas culturalas ed è creschida si a Cham en il chantun Zug. Dapi l'avust è la dunna da 39 onns la nova directura artistica da la Fundaziun Nairs a Scuol. Ella è succedida a Clifford E. Bruckmann.
Nairs duai esser in lieu vivent – la finamira è d’attrair dapli glieud en la chasa d’art.
Legenda:
La nova directura d'art – Josiane Imhasly
RTR
Avrir las portas per tuttas e tuts
A Nairs vegn tant preschentà art e litteratura contemporana, musica experimentala sco er dà dimora ad artistas ed artists che vulan sa sviluppar e nua che han lieu durant tut l'onn diversas occurrenzas. La nova directura Josiane Imhasly vul dar pais al tema plurilinguitad. Ella sezza ch'è creschida si en il chantun Zug cun geniturs vallesans discurra pliras linguas ed è vid emprender rumantsch.
Finanzas – in tema permanent
La fundaziun Nairs cumbatta dapi plirs onns cun las finanzas e quest tema vegn era ad occupar la nova directura d'art. Per ella èsi impurtant d'avair ina buna relaziun cun la politica regiunala, ma era cun tut ils fauturs e sponsurs enturn la chasa d'art a Nairs.
Fundaziun Nairs
Avrir la boxSerrar la box
La Fundaziun Nairs, fundada l'onn 2005, è ina sintesa da la chasa d'art, da la sala d'art e dal labor cultural. Ella collia l'Engiadina cun autras culturas sin quest mund. En il rom da ses program internaziunal d'artistas ed artists en residence envida ella mintg'onn var 30 artistas ed artists tschernids d'ina giuria a segiurns d'atelier da plirs mais. La fundaziun promova il dialog e la collavuraziun tranter las differentas spartas d'art. La sala d'art mussa art preschenta en localitads d'exposiziun istoricas e sa deditgescha a dumondas contemporanas. Il labor da cultura s'engascha per l'intermediaziun ed il svilup da la cultura locala e rumantscha e realisescha ina gronda paletta da projects.
