La Regiun Engiadina Bassa Val Müstair ha approvà in nov concept davart la politica d'uffants e da giuvenils. La finamira è da coordinar meglier las purschidas existentas ed uschia rinforzar l'attractivitad da la regiun per famiglias e da cumbatter la depopulaziun. Il concept sa drizza a persunas giuvnas fin 25 onns – pia a var 1'800 persunas u 20% da la populaziun.
Bleras mesiras previsas sa basan sin purschidas gia existentas, per exempel sin cumissiuns per giuvenils, lieus da scuntrada per giuvenils u purschidas d'assistenza.
Medemamain duain vegnir examinadas sistematicamain meglieraziuns, per exempel novs lieus da scuntrada, purschidas dal traffic public favurisadas per giuvenils u ina meglra utilisaziun da locals publics.
Ina politica d’uffants e giuvenils activa è er ina mesira per mantegnair l’attractivitad da la regiun per la generaziun giuvna e per famiglias – e per cumbatter activamain la depopulaziun en la regiun.
In nov element central è la fundaziun d'in parlament da giuvenils regiunal che duai sa radunar per l'emprima giada l'atun 2026.
L'idea deriva da la giuventetgna sezza e duai promover la participaziun a la discussiun, la furmaziun politica ed il barat sur ils cunfins communals.
Noss'incumbensa è da tadlar la giuventetgna. Nus faschain la politica era per la proxima generaziun e perquai stuain era manar ina discussiun averta.
Il concept definescha, ultra da quai, cumpetenzas pli cleras: mintga vischnanca duai numnar ina persuna da coordinaziun responsabla. Quella fa era part da la cumissiun directiva ch'è responsabla per il concept da politica d'uffants e giuvenils che s'inscuntra regularmain. Dumondas da finanziaziun restan en la cumpetenza da las singulas vischnancas e n'èn betg part dal concept.