Siglir tar il cuntegn

Header

Vista sin San Murezzan che sa spievla en il lai.
Legenda: San Murezzan RTR, Seraina Derungs
cuntegn

Engiadina San Murezzan SA San Murezzan surpiglia ina part dal deficit

Suenter ch'il cussegl communal aveva refusà da tractar la dumonda davart surpigliar il deficit da l'onn 2019 en sia sesida dal mars ha el decidì gievgia unanim da sustegnair l'Engiadina San Murezzan Turissem SA. Quai suenter che las dumondas fatgas lura en ina interpellaziun eran vegnidas respundidas da la suprastanza communala.

La vischnanca da San Murezzan surpiglia cun quai bundant 247'000 francs dal deficit da totalmain 700'000 francs.

Ulteriuras decisiuns

En pli ha il cussegl communal da San Murezzan decidì dad organisar da nov l'organisaziun davart la lavur sociala da scola e d'integrar il post dal lavurer da giuvenils en l'administraziun communala.

Percunter n'ha il cussegl betg vulì fundar ina cumissiun che duai accumpagnar la sanaziun da la chasa da parcar Quadrellas. Persuenter duai vegnir fundada aifer 90 dis ina cumissiun che vegn a s'occupar d'in concept cumplessiv da traffic e da mobilitad.

Ulteriur sbassament dal pensum

Sco davos è il cussegl communal anc vegnì infurmà che la suprastanza communala ha decidì da sbassar il pensum dal president Christian Jott Jenny da 90 sin 80%. Persuenter vegn il pensum dal vicepresident Reto Matossi augmentà sin var 30%. Quai sco soluziun pussaivla per las differenzas d'opiniuns da manar la chanzlia communala. Matossi duai damai mussar preschientscha sin chanzlia uschia che Jenny po tgirar relaziuns dador la chasa communala. Il barat da pensum duai durar da l'avust fin il december, lura vulan ins evaluar la situaziun da nov, hai gì num.

RTR novitads 06:00

Artitgels legids il pli savens

Scrollar a sanestra Scrollar a dretga