Las 11 vischnancas da l'Engiadin'Ota han da decider ils 17 d'avust davart l'avegnir da l'eroport da Samedan – i va per il nov project da renovaziun e sia finanziaziun. La conferenza da l'eroport ha deliberà ils 2 da fanadur il messadi da votaziun final per il project. Quel cuntgna entgins augmends e precisaziuns cumpareglià cun l'emprima versiun deliberada mez avrigl.
Il messadi cuntegna duas dumondas. L'emprim sto il suveran abolir la votaziun dal mars 2017 per investiziuns en l'infrastructura da l'eroport. Lura vai era per conceder in credit d'impegn da 38 milliuns francs e da surpigliar la responsabladad per emprests da terzs da total 20 milliuns francs.
San Murezzan che profitescha ordvart da l'eroport da Samedan ha plinavant gì da decider ordavant davart ina contribuziun speziala da 5 milliuns francs. Quella contribuziun ha la populaziun approvà cleramain la fin zercladur.
La conferenza da l'eroport discurra cun deliberar il messadi d'in pass impurtant per renovar l'eroport regiunal a Samedan. Dapi dus onns vegn fatg preparativas en quest connex. Sper il messadi da votaziun ha la conferenza da l'eroport approvà il quint annual, il rapport da gestiun ed il rapport d'indemnisaziuns dal 2024.
Renovaziun en trais etappas
Il project da renovar sa cumpona da pliras etappas. En in'emprima etappa vegn la Rega a construir il heliport per tut las trais interpresas da helicopter a Samedan, quai enfin la fin 2026. En la segunda etappa enfin il 2031 è planisà da renovar las construcziuns autas da la plazza aviatica sco er ulteriura infrastructura (edifizis, hallas da vehichels etc). En in'ulteriura etappa è planisada da engrondir la plazza da preparaziun da partenza e la sanaziun da la pista. Quest pass è previs suenter l'onn 2031.
Dapli davart las entschattas e las etappas da l'eroport: