Per la segunda giada ha gì lieu il festival Scuol Classics en Engiadina. En il center è stada questa giada l'ovra monumentala da Carl Orff «Carmina Burana». Tenor ils organisaturs hajan els survegnì fitg buns resuns, ma tuttina saja l'interess stà pli flaivel cumpareglià cun l'emprima giada avant dus onns.
Per il president dal festival Andrea Matossi che accumpogna il project dapi la fundaziun, mussan ils numerus resuns ch'il concept chatta era vinavant interess. Tuttina sajan vegnids vendids pli paucs bigliets che tar l'emprima ediziun. In motiv pussaivel pudess tenor Matossi esser stà la selecziuns da l'ovra.
Cumbain che «Carmina Burana» cun il preludi fitg renumà «O Fortuna» è ina da las ovras per chor las pli enconuschentas insumma, saja il toc sco entir stà pli pauc preschent al public che autras ovras classicas.
Cuntinuar, ma forsa en in'autra moda
Tut en tut han ils organisaturs registrà radund 1'600 entradas. Tar la premiera avant dus onns eran quai anc stà 2000 visitadras e visitaders. Ultra da quai hajan els survegnì singuls resuns ch'ins avess pudì far dapli reclama per il festival, surtut en l'Engiadin'Ota.
Malgrà la preschientscha da public pli pitschna, prevesan ils organisaturs da cuntinuar cun ils Scuol Classics. I vegn dentant discutà da sviluppar vinavant il format. Ina sfida centrala resta la finanziaziun: il festival è planisà cun in budget da radund 500'000 francs. En l'avegnir duai esser pussaivel da chattar vias per reducir ils custs ed ina basa stabila a lunga vista.