Avant 3 onns ha el cumenzà cun sia firma, ensemen cun auters guids da muntogna dad autras regiuns. Uschia han els la pussaivladad da gidar in a l’auter e nizzegiar sinergias.
Marco Steinemann abita en Engiadina Bassa, perquai ha quella regiun natiralmain prioritad, ma era ina tura sin il Matterhorn è previsa. Tar sia lavur ston ins esser flexibel. Uschia porscha el turas dad in di ma era da plirs dis, sco per exempel en tschintg dis sin indesch pizs da 4’000.
Definir in giast n'è betg pussaivel per el. Ina giada vul ina famiglia chaminar sin ina muntogna indigena nunenconuschenta, in’autra giada um e dunna sin il Bernina.
Oravant tut curs èn dumandads
Gist en vischinanza, numnadamain ad Ardez datti in curtin da raiver, in ideal lieu per mussar la tecnica da rampignar ed emprender d’enconuscher ils untensils che fan da basegn per lura ir sin agen ristg a far las emprimas experientschas sin naiv e glatsch. Per e tut ils auters datti guids da muntogna sco Marco Steinemann.
