Sco il chanzlist da La Punt Chamues-ch, Urs Niederegger, ha declerà, haja la suprastanza tractà il giavisch da l’iniziativa en il sen positiv. Da principi saja numnadamain gia stada prevesida questa zona da mastergn e d’abitar tar l’elavuraziun da la planisaziun locala. Dentant aveva la suprastanza decis da desister per il mument sin quella, perquai ch’i vegnia gia bajegià avunda en vischnanca.
Pussaivladad è dada
La vischnanca da La Punt Chamues-ch haja gia terminà la revisiun da la planisaziun locala e quai sco emprima vischnanca en il Grischun, uschè Urs Niederegger. Quai signifitgia er che la vischnanca possia sa sviluppar vinavant, er cun stgaffir novas zonas. A reguard las duas parcellas pertutgadas haja la vischnanca dentant gia laschà sclerir las circumstanzas cun in biro da planisaziun ed inoltrà la midada giavischada a maun d’in rapport da planisaziun e coordinaziun tar il Chantun. Fin che quel ha decis en chaussa – previsiblamain entaifer ils proxims trais mais – saja l’iniziativa vegnida sistida, ha declerà il chanzlist da La Punt Chamues-ch.
Sche tut vegniss approvà da Cuira, spargnass la vischnanca dad ir cun l’iniziativa avant radunanza communala e pudess gia suttametter in project concret per la nova zona da mastergn e d’abitar.