Las vischnancas Bever, La Punt-Chamues-ch, Madulain, Zuoz e S-chanf vulan professiunalisar lur provediment d’aua. Quai duai vegnir fatg cun fundar ina uniun d’interess sut il tetg da la organisaziun per la serenaziun d’Engiadin’Ota.
Quai per evader ina radunanza da delegads e delegadas dapli, ma era per profitar da la savida da l’organisaziun da serenaziun, ensemen cun in chau-funtauna per tuttas tschintg vischnancas
Il chau-funtauna è responsabel da quel mument cura che l’aua vegn or da la muntogna fin tar la spina.
Metter ensemen per professiunalisar il provediment
Las responsabladads d’in chau-funtauna cumenzan tar l’aua da funtauna. Cun prender provas da las differentas funtaunas d’aua e trametter quellas al labor chantunal duai vegnir garantì che l’aua da baiver saja segira e na saja betg in risico per la sanadad dals consuments e consumentas.
Ins pretenda adina dapli da la qualitad da l’aua. Ella vegn era controllada adina pli spessa, perquai duvrain nus ina persuna che s’occupa fitg professiunal cun la materia.
Regulaziuns ed il plan per plan d’urgenza
L’incumbensa per il provediment d’aua è la incumbensa da las vischnancas Grischunas. Tenor l'Uffizi per la natira e l'ambient dal Grischun datti en tut il chantun bundant 370 raits da provediment d’aua. Las mesaunas e grondas raits, radund 150 tocs, duain avair in plan per urgenzas.
Questas urgenzas cumpiglian per exempel ruttadiras vi da lingias da la rait d’aua u era lavurs las vischnancas han da far sch'i da ina perioda da sitgira. Per las raits pli pitschnas, che furneschan aua da baiver per pli pauc sco 200 persunas, furnescha il chantun Grischun agid per talas urgenzas, saja quai cun cisternas d’aua da baiver u era cun agid organisatoric.
Tschintg vischnancas, in chau-funtauna
Per elavurar quest plan d’urgenza vulan las tschintg vischnancas da La Plaiv e Bever avair ina persuna responsabla. Sper quest plan d’urgenza duai vegnir prendidas era regularmain provas d’aua da baiver da las funtaunas, per garantir ina auta qualitad da l’aua e chattar ed impedir contaminaziuns da las funtaunas.
Per pudair porscher ina plazza da lavur a 100%, ed er avair avunda lavur per ina chau-funtauna saja tenor Thomas Pinchera, responsabel per il provediment d'aua da Zuoz e S-chanf e commember da la gruppa da lavur deditgada a l'uniun dal provediment d'aua, ina buna idea dad unir las tschintg vischnancas en ina uniun.
Atgnamain dovra mintga vischnanca in chau-funtauna. Pero èsi grev per da chattar talas persunas. Era pervi che pitschnas vischnancas na pon betg offrir ina plazza da lavur da 100%, èsi bun da pudair offrir ina plazza per tut las tschintg vischnancas ensemen.