La claustra San Jon a Müstair festivescha quest onn ses 1250avel anniversari. Or da quel motiv organiseschan ils responsabels dal museum ina retrospectiva per la pli veglia mungia da la claustra – sora Pia.
Sora Pia è stada artista, concepidra da text ed era priura. L’exposiziun per la sora Pia Willi porta il num «Kunst & Kloster».
Pia Willi è cun ses 93 onns la pli veglia sora benedictina da la claustra a Müstair. Avant ch'entrar en claustra ha ella absolvì la scolaziun classica d’art e la scola d’art applitgada a Turitg sco era l’academia André Lhote a Paris.
Da Paris a Müstair
En claustra ha ella lavurà vinavant creativ. Ella ha sviluppà 93 skizzas da retgam per costums engiadinais ed ella ha era creà divers costums engiadinais sin giavisch spezial per las dunnas engiadinaisas e da la Val Müstair.
A chaschun da quell’exposiziun vegn lantschà il project dad ina banca da datas digitala dals costums en Grischun. En quella banca da datas pon ins chargiar fotografias da l'agen costum. Uschia èsi pussaivel da mantegnair las differenzas dals costums per pli tard – ed igl è era pussaivel da vesair nua ch'ils costums fatgs en claustra èn sa tschentads – da Puntraschigna fin a Minca.
L’exposiziun cun il titel «Kunst & Kloster» cumenza ils 26 da zercladur e cuzza fin ils 6 d'avrigl 2026.