Dapi decennis vegn discutà e dispità en Engiadin’Ota sur da la saiv enturn la plazza aviatica a Samedan. Ils plans prevesevan ina saiv auta enturn il perimeter da 3,7 kilometers. Cun 2,5 fin 3,5 meters autezza ed or da metal, avess questa saiv stuì servir a la segirezza e cun quai impedir a la glieud ed als animals selvadis d'entrar en il plazzal e chaschunar disturbis en il manaschi da sgol. Ma il cuntravent per quest project era grond, perfin cun ina petiziun che na vuleva betg uschè ina saiv.
Ina «nova» saiv
Entant ha la INFRA plazza aviatica Samedan midà ils plans per la saiv. Cun discutar e negoziar cun partidas involvadas ed interessadas ha la INFRA redimensiunà la saiv. Ussa duai quella vegnir construida en stil engiadinais or da lain.
Per Mario Cavigelli, il president da la INFRA, saja questa nova saiv ina che signalisescha il cunfin dal terren da la plazza aviatica. Cun l’autezza planisada dad 1,2 fin 1,4 meters po la saiv vegnir surpassada senza gronds problems.
Igl è ina saiv che fa attent ch'i dat in cunfin. Uschia che uffants, chauns e glieud restan dador il perimeter.
Ils custs dal project ins haja stimà sin dus milliuns francs.
Ma i n'è anc betg uschenavant
Tenor Mario Cavigelli duain las lavurs vi da la saiv cumenzar d’atun da quest onn. Però be sche l’Uffizi federal d’aviatica civila dat la permissiun da construcziun. E sin quella spetga la INFRA anc, quai per surdar las lavurs da construcziun per la nova saiv. Mario Cavigelli è da buna speranza che la decisiun vegnia fatga relativamain svelta. Las lavurs per il project èn gia vegnidas scrittas ora.
La surdada da las lavurs da construcziun vegn pir fatga, cur che nus avain ina decisiun finala da l'uffizi federal cumpetent.
Quai pervi che l’uffizi è stà involvà en tut la procedura da planisaziun, ed era en las discussiuns cun las partidas involvadas. Il Gea da l’uffizi è er impurtant, perquai che la Confederaziun surpigliess 38% u maximalmain 900’000 francs dals custs per la saiv enturn il perimeter da la plazza aviatica a Samedan.