Onn per onn datti pli grondas plunas da ballas da silo e da fain. In motiv è che l’aura ideala ha laschà crescher optimalmain l’erva sin la prada. Uschè bler che tut quel fain n'avess gnanc spazi en il clavà.
In auter motiv è ch'ils purs han adina pli grondas surfatschas ch’els cultiveschan, quai era sco consequenza da la politica agrara ch'adattescha ils pajaments directs a la surfatscha.
Las reservas èn grondas
Blers purs han per il mument in problem da luxus: Els han memia bleras ballas da silo ed han difficultads da magasinar quellas. Per part han els anc ballas d’avant trais onns. Tenor Batist Spinatsch dal Plantahof pon ins pavlar talas ballas era anc suenter trais onns, sche quellas na sajan betg donnegiadas e sajan fatgas cun premura – pia senza avair en terra u autra merda. Vegn dentant aria tras la folia saja d’allontanar las ballas sin ina deponia adattada, e quai po custar fin 200 francs per tonna.
In auter problem saja la plazza per deponer talas ballas. Leschas federalas prescrivan che ballas da silo na dastgan betg vegnir messas en vischinanza d’auals, guauds e zonas protegidas e mintg’onn stuessan ins midar lieu.
-
Bild 1 von 3. Ils purs èn per part surchargiads dal grond dumber da ballas da silo da quest onn. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
Bleras vischnancas en Grischun prescrivan en la lescha da construcziun schizunt che ballas stoppian vegnir deponidas tar la stalla. Autras vischnancas – sco per exempel Cuira, Ziràn u Churwalden – pretendan in permiss e limiteschan il temp sin be quatter mais.
Per blers purs èn talas prescripziun ina gronda sfida, causa ch'ad els manca simplamain il lieu adattà sco era la basa legala per deponer las massas da ballas da quest onn.