Resort Rachögna - «In plan B n'avain nus betg»

Gia dapi 20 onns è la parcella a Rachögna, gist sper las pendicularas Motta Naluns a Scuol, en possess da l'Acla da Fans SA. E dapi var 16 onns existan qua, ensemen cun il biro d'architectura Fanzun, er ideas concretas per realisar in project per in resort da vacanzas cun var 200 letgs d'hotel e 60 abitaziuns gestiunadas. Fin al di dad oz però resta il project «Rachögna-Resort» entant in gieu da pazienza.

«Rachögna-Resort» sin in'egliada

Avrir la box Serrar la box

Suenter en tut 16 onns planisaziun e pliras proceduras da construcziun, sco per exempel proceduras da concepziun, proceduras da la planisaziun da quartier e differents recurs, pareva il «Rachögna-Resort» dal 2023 dad esser sin buna via. Durant la publicaziun dal permiss da construcziun hai però dà dumondas avertas en chaussa. Quai areguard l'Ordinaziun federala davart la protecziun cunter la canera. Il permiss da construcziun n'ha perquai betg pudì vegnir publitgà e per tut las partidas involvidas hai gì num: anc ina giada enavos al cumenzament.

Il project en cifras:

• Lieu: Sper las pendicularas Motta Naluns a Scuol
• Dimensiuns parcella: 12'000m² – quai che è in zic dapli ch'ina plazza da ballape (10'000m²)
• Dimensiuns project: 200 letgs d'hotel e 60 abitaziuns gestiunadas
• Segment da pretschs: «Low Budget»
• Custs: 60 milliuns francs (stima dal 2023)
• Patrun da construcziun: Acla da Fans SA
• Planisaders: Biro d'architectura Fanzun
• Temp da planisaziun: 16 onns
• Realisaziun: anc betg definì

Tge ch'è capità e co che i va vinavant cun il project a Rachögna raquinta Hansueli Baier, president dal cussegl administrativ da l'Acla da Fans SA, en in discurs cun la FMR.

FMR: Sch'ins passa sper Scuol via, sche dattan ils profils sin Vossa parcella ad in u a l'auter segir en egl. Quels stattan là numnadamain gia dapi il 2019. Ins pudess pia pensar che i na saja capità bler durant quests ultims 7 onns?

Hansueli Baier: Tar tals projects gronds, saja quai qua a Scuol ubain lura er insanua auter, as sto simplamain adina far quint cun temps da planisaziun da 10 fin 15 onns. Davos las culissas èsi però capità bler. Sper numerusas proceduras e recurs, hai adina puspè er dà differents midaments, saja quai midaments da persunal tar l'uffizi da construcziun ubain lura er midaments da las leschas. E quai ans ha natiralmain adina puspè bittà enavos. Actualmain avain nus però puspè in zic dapli speranza che questa via – per part mintgatant dolurusa e stentusa – pudess a la fin finala tuttina anc prender ina buna fin.

Actualmain è il vischnanca da Scuol numnadamain vidlonder a reveder la planisaziun locala. Durant quest process dastga er la populaziun s'exprimer en chaussa e qua vesain nus ina schanza che nus pudessan chattar finalmain ina soluziun che fa via per pudair tuttina realisar il project. Nus fissan en mintga cas pronts e spettain ussa ils proxims pass da la vischnanca da Scuol.

Il 2023 è vegnì inoltrà in emprim permiss da construcziun, il project pareva da daventar adina pli concret. Tge che mancava quella giada era anc in investur. È quel entant chattà?

Na, in investur na giain nus betg a tschertgar fin che nus n'avain betg sin maisa in permiss da construcziun definitiv. Quai fiss ina lavur da Sisifus. Nagin investur na sa laschass er mai persvader d'in tal project senza in permiss da construcziun definitiv.

Però nua che nus essan gia in grondischem pass enavant, è tar la tschertga d'in gestiunari. Quel avain nus entant chattà. I sa tracta d'ina interpresa internaziunala che lavura en la branscha d'hotellaria. Per nus e noss project è quai in grond surlevtg. In investur sa lascha numnadamain mo chattar, sch'ins ha gia chattà in gestiunari.

Supponin ch'in permiss da construcziun fiss sin maisa – quant difficil fiss da chattar actualmain insumma in investur per in project turistic en questas dimensiuns?

Las schanzas fissan actualmain gist fitg bunas. Gist er perquai fissan nus fitg cuntents, sch'i dess in stumpel en direcziun realisaziun. Nus avain per il mument ina fasa cun fits bass e durant ina tala fasa èn projects, sco qua a Rachögna, sa chapescha fitg interessants per investurs. Quels èn numnadamain interessads da pudair realisar ina buna rendita, quai che è pli difficil actualmain sin il martgà da chapital ordinari cun fits strusch als nulla pertschient. En il sectur d'immobiglias perencunter pon ins bain far quint cun ina rendita da trais fin tschintg pertschient.

Er ils custs totals dal project han dà da discutar en il passà. Oriundamain as fascheva quint cun custs totals da 40 fin 50 milliuns francs, pli tard lura as discurriva da var 60 milliuns francs. Quanta rumpatesta As procura quest svilup, gist er en vista a tants retards dal project?

Jau na crai betg che 60 milliuns francs tanschian per realisar quest project ozendi. Durant ils ultims onns è la chareschia en tut l'Engiadina s'augmentà per bainquant sur la media svizra e quai ha natiralmain er in grond effect sin ils custs da quest project.

Plinavant vegn vitiers anc l'inflaziun. Perquai supponin nus custs pli auts. Jau na sun però nagin profet ed avant che nus n'avain betg il permiss da construcziun definitiv, ma vuless jau tegnair enavos er en quest reguard, da communitgar publicamain ina cifra.

Dapi 20 onns planisais Vus gia, dapi 10 onns pli concret, dapi il 2019 stattan ils profils ed ussa avain nus l'onn 2026 e la realisaziun dal project è anc adina pendenta. Avais Vus insumma anc l'energia e la motivaziun ch'i dovra da persequitar quest project vinavant?

Questa dumonda ans avain er nus fatg gia tantas e tantas giadas en il passà. Nus essan ussa simplamain en possess da questa parcella, ina parcella che è classifitgada en la zona d'hotellaria e dal turissem. I na ans resta gnanc bler auter che da chattar ina soluziun sin questa via. In «plan B» n'avain nus betg, perquai che insatge auter che in hotel ubain abitaziuns gestiunadas na pudain nus en mintga cas gnanc realisar sin questa parcella.

Nus avain però fortuna d'avair avunda energia e motivaziun, e nus na dain dal segir er betg si la speranza. Da quai essan nus tuts ensemen d'accord, tant l'Acla da Fans SA sco er l'interpresa Fanzun. Dal rest vegnan ils custs per sviluppar quest project er repartids tranter questas duas interpresas, quai che porta cun sai uschia er ina tscherta distgargia vicendaivla.

Resorts en questas dimensiuns fruntan adina puspè sin critica e resistenza, qua na sa differenziescha Voss project insumma betg dad auters. È in resort cun 200 letgs d'hotel e 60 abitaziuns gestiunadas ord il punct da vista d'ozendi però insumma anc realistic e realisabel?

Che in tal project na vegnia betg beneventà da mintgin, cun quai era natiralmain da far quint. Quai n'è a Scuol betg auter che en auters lieus. Cun tals obstachels stuain nus sco planisaders simplamain vegnir a frida. Er sche bleras autras ideas per resorts n'han betg tant cuntravent – stain nus cun plaina forza davos noss project a Rachögna. Resorts da vacanzas èn ozendi numnadamain models da manaschis fitg dumandads, quai demussa il svilup dal martgà. E fin che i n'exista betg ina surpurschida da tals resorts, èn quels er senza auter realisabels.

Uschia per finir anc la suandanta dumonda: Cura pon ins pia far quint che ils profils vegnian finalmain allontanads e che or dal prà verd possia nascher in bel di Voss project da construcziun giavischà?

Nus sperain che durant il decurs da quest onn survegnian nus almain da tut il permiss da construcziun. E lura guardain nus enavant. En mintga cas na laschain nus dal segir betg crudar quest project.