L’hotel Engiadina a Zuoz è serrà dapi l’october 2023. La raschun è ina sanaziun cumpletta da l’edifizi entamez il vitg. Quant ditg che las lavurs da sanaziun duran anc, è grev da giuditgar, uschè il pèr d’investiders Franklin e Sandra Schatzmann. Lur finamira è da dar puspè a l’hotel, ina taimpra speziala, ina che lascha reviver er l’istorgia dal passà. Perquai duai l’edifizi er puspè purtar ses num oriund «Concordia». Al pèr Schatzmann è quest aspect in dals principals per s’engaschar cun corp ed olma per il project.
Nus vulain sanar l’hotel a Zuoz cun gronda passiun. Senza quella na gartagess quai mai.
La famiglia Schatzmann ha cumprà dal 2022 dus hotels en il center da la vischnanca da Zuoz. L’hotel Engiadina, construì dal 1876, l’hotel Crusch Alva ha perfin in’istorgia da passa 500 ans. Davart cifras, na vulan ils dus investiders dentant tradir nagut.
-
Bild 1 von 7. Hotel Engiadina vegn ad avrir sias portas suenter la sanaziun cumpletta cun ses num oriund: Concordia. Bildquelle: RTR.
-
Bild 2 von 7. Cla Duri Cuorad, il manader da project durant la sanaziun da l'hotel. Bildquelle: RTR.
-
Bild 3 von 7. La sanaziun da l'hotel vegnia fatga cun premura e cun resguardar mintga singul detagl. Bildquelle: RTR.
-
Bild 4 von 7. Bildquelle: RTR.
-
Bild 5 von 7. Las tapetas vid la paraid vegnan ad avair ina taipra che regurda al vegl hotel Concordia dal 1876. Bildquelle: RTR.
-
Bild 6 von 7. Sper l'hotel Concordia vegn actualmaing realisada ina partiziun da wellness. Bildquelle: RTR.
-
Bild 7 von 7. La dependance «Bellaria», nua ch'il persunal dals hotels en possess da la famiglia Schatzmann lavura. Bildquelle: RTR.
Oriundamain fiss stà previs da re-avrir l’hotel Concordia per questa stagiun d’enviern. Las lavurs pretensiusas da sanaziun dovrian dentant dapli temp. U sco Franklin Schatzmann ha declerà:
La sanaziun dovra tant temp sco ch’i fa da basegn e fin che nus essan persvadids che l’hotel è pront per avrir per noss giasts.
Per savair porscher al persunal lieu d’abitar – per la gestiun dal nov hotel Concordia vegn fatg quint cun 30-40 persunas – han ils investiders pudì cumprar in bajetg en il quartier Chaunt da Crusch. Quel era vegnì fabritgà sco hotel. Malgrà pliras midadas da possess ils ultims onns, n’è hotel dentant mai stà avert.
Avertura da nov hotel a Zuoz
Entant s’èn ils plans midads ed ils investiders s’èn decidids da laschar lur persunal en la dependance Bellaria e d’avrir in hotel en l’edifizi ch’els avevan cumprà. Sco Franklin Schatzmann ha declerà ad RTR s’haja sviluppada l’idea pir avant bun dus mais.
Il nov «La Senda Smart Hotel» cun 25 stanzas gestiunadas porscha dapi ils 20 da december 2025 ina nova pussibilità d’accomodaziun per giasts nuncumplitgads. Uschè pon quels far il check-in gia ordavant sez.
-
Bild 1 von 3. Dapi ils 20 da december 2025 è avert l'hotel La Senda a Zuoz. Bildquelle: Unir Zuoz SA.
-
Bild 2 von 3. L'hotel en la classa da budget bass è situà a l'ur dal vitg a Zuoz cun vista vers l'Engiadin'Ota. Bildquelle: Unir Zuoz SA.
-
Bild 3 von 3. Ina da las 25 stanzas en il nov hotel La Senda. Bildquelle: Unir Zuoz SA.
La sanaziun da l’hotel Concordia a Zuoz duai esser terminada per la stad, uschè Franklin Schatzmann. Uschè possian els er puspè porscher letgs d’hotel impurtants, che van a perder a Zuoz tras ina sanaziun da l’hotel Castell a partir dal mars 2026.