Lex Koller - Limitar la fiera da cumprar hotels

Hotels grischuns – cunzunt da la pli auta categoria – tutgan savens ad esters. Avant dus onns han per exempel investurs da la Rumenia e Lituania cumprà l'hotel da tschintg stailas «Waldhaus». Dapi lura è capità pauc a Flem, l’avertura è pir planisada en circa in onn.

Sper il lai da Thun è capità insatge sumegliant. L'hotel «Bellevue au Lac» è vegnì acquistà per 10 milliuns francs d'ina gruppa dad Abu Dhabi. Dapi lura na vegn betg pli servì alcohol e charnpiertg, l'hotel è pia halal (prescripziuns islamicas da mangiar). La populaziun sa disturba da tals svilups, sco quai che SRF ha rapportà l’atun.

L’anteriur moderatur da «Kassensturz» e cusseglier naziunal da Berna, Ueli Schmezer (PS), vul impedir venditas en l’exteriur. En ina columna da video sin la plattafurma nau.ch di el: «Jau hai pli gugent, sche hotels vegnan cumprads da persunas ch’èn pli u main ragischadas en la regiun.» Perquai dovria dentant ina midada da l'uschenumnada Lex Koller.

L’excepziun da la Lex Koller

La «culpa» che hotels sa tschentan en mauns esters è in’excepziun en questa Lex Koller. La lescha limitescha atgnamain la cumpra d'immobiglias en Svizra per persunas che n’han nagin domicil qua – quai per impedir che memia bler terren svizzer tutgia a persunas da l’exteriur.

Enfin l’onn 1997 pertutgava la lescha betg mo terren privat, mabain er immobiglias da fatschenta. Il parlament ha dentant lura – pervia da problems da conjunctura sin squitsch da partidas burgaisas – puspè lubì a persunas da l’exteriur da cumprar immobiglias da fatschenta. Ed avant intgins onns n'è in’emprova da midar la Lex Koller betg gartegiada.

Ina nov’emprova vuless il parlamentari da la vart sanestra, Ueli Schmezer, ussa ristgar, sco ch’el ha tradì il mardi passà a la FMR a l’ur da la sessiun d’enviern a Berna. Pertge che «cun questa excepziun èsi dapi onns pussaivel, ch'investurs da l’exteriur cumpran hotels svizzers en ils pli bels lieus. Investurs svizzers n’han simplamain nagina schanza cunter il chapital ester.» Il segund problem è tenor el: blers «parcheschan» ils daners uschia en Svizra, ils pretschs d’immobiglias vegnan suflads si.

Ernst Wyrsch è sceptic

Ernst Wyrsch, il president da l'Uniun grischuna d'hoteliers, na vesa il chapital ester betg sco smanatscha per l'hotellaria en il Grischun. El accentuescha ch'i dettia avunda regulaziuns per proteger ils hotels e ch'i saja impurtant d'investir per mantegnair l'infrastructura.

Al «Waldhaus» Flem declera el ch'investiders svizzers hajan manchentà la schanza da cumprar l'hotel e quai haja manà a sia decadenza. Wyrsch avertescha ch'investiders svizzers sajan savens tardivants, insatge che possia esser problematic en il sectur turistic volatil.

Passa 1 milliarda francs investiziuns en l’Engiadin’Ota

La branscha d'hotellaria en Svizra ha attratg ils ultims onns var 3,4 milliardas francs – investiziuns da passa ina milliarda francs en il Grischun ils proxims 5 onns, per gronda part da l'exteriur. «En l'Engiadin'Ota vegn investì ils proxims tschintg onns passa ina milliarda francs en hotels, da quels era fitg blers da l'exteriur. Nus sco societad cooperativa ans legrain, sch'ins crai uschè fitg en l'avegnir dal turissem e da l'hotellaria.» Sch'el haja lura pli gugent ch'ils hotels giajan en mauns esters?

Ernst Wyrsch, president da l'Associaziun grischuna dals hoteliers, punctuescha ch'ins prefereschia ina soluziun svizra, i manchia dentant investiders locals. Sco positiv menziunescha el la vendita da l'hotel da luxus Arosa Kulm ad in Svizzer. Il parlamentari, Ueli Schmezer, planisescha da reglar investiziuns da l'ester cun la Lex Koller, frunta però sin sustegn intschert en il parlament e spetga resistenza.