Avant 11 onns ha il bogn cuvert Ovaverva a San Murezzan festivà si’avertura. Dapi l’avrigl da quest onn vegn quel sanà cumplettamain. Donns vi dals batschigls e las isolaziuns han chaschunà che l’aua culava en tut las direcziuns ma na restava betg en ils batschigls.
Tractativas giuridicas pendentas
Ils donns avevan ins constatà gia avant otg onns, be trais onns suenter l'avertura. Dispitas giuridicas davart las responsabladads e tgi che ha da surpigliar ils custs da sanaziun e l'elavuraziun dal concept da la sanaziun cumplexa han retardà las lavurs.
Las lavurs da sanaziun èn calculadas cun passa 12 milliuns francs per in bogn che aveva custà passa 66 milliuns francs. La vischnanca da San Murezzan ha decis da surpigliar ina prestaziun preliminara per evitar consequenzas anc pli severas. Ils cas giuridics èn anc adina pendents.
Guardar optimistic en l’avegnir
Er sche questa situaziun n'è betg agreabla vul la vischnanca far il pussaivel per porscher uschè svelt sco pussaivel puspè la purschida turistica e pudair garantir la segirezza dal bogn, ha ditg Ramiro Pedretti, il president da la cumissiun «sanaziun Ovaverva». Sche tut va sco giavischà po il bogn Ovaverva avrir il matg da l'onn che vegn puspè sias portas.
Or da l'archiv