La populaziun da San Murezzan na vul betg introducir in model da CEO per la gestiun da la vischnanca. Ella ha refusà a l’urna la dumonda cun 709 encunter 508 vuschs.
Per il president communal, Christian Jott Jenny haja quest resultat er da far cun ina communicaziun betg gartegiada.
Il titel da la missiva «model da CEO» n’è betg vegnì tschernì ideal cun quai ch’ils CEO's n’han betg propi in bun image. Ultra da quai èsi stà fitg difficil da declerar a la populaziun ils avantatgs da quest model.
Cuntent ch’il model da CEO n’è betg vegnì approvà è stà il parlamentari Martin Binkert ch’aveva cumbattì per in Na. Tenor el fiss la midada stada memia gronda per il vitg. Ins haja gia fatg singulas megliuraziuns ed ins possia bain er adattar anc auters pass per simplifitgar la gestiun, senza introducir il model da CEO.
Er betg dapli raps
Ditg Na cun 746 vuschs encunter 450 han ils da San Murezzan er a la dumonda per in augment da remuneraziun dad organs communals ed uffiziants. Las indemnisaziuns èn actualmain regladas en ina ordinaziun.
Parlament pli pitschen
A la reducziun dal parlament da 17 sin 11 sezs han ils da San Murezzan percunter dà lur consentiment. (Gea 894 vuschs – Na 338 vusch) Il gremi en furma pli pitschna vegn ad ir en vigur il 2027.