Dapi glindesdi hai num en l'Austria 2G empè da 3G. Quai munta dapli restricziuns per persunas che n'èn betg vaccinadas. Las pendicularas da Samignun ed Ischgl han uss dentant decis ch'i duai da vart Svizra, a Samignun, tuttina restar pussaivel dad ir cun skis er cun in test negativ da corona, pia tenor il principi da 3G. Per quest intent datti quest enviern la carta dal di Samignun. Questas novas reglas valan a partir dals 25 da november. Quai scrivan las pendicularas en ina communicaziun.
Irritaziun tge che duai valair
Oriundamain eran ils dus territoris sa cunvegnids da mintgamai laschar valair en l'entir territori las reglas ch'èn pli severas. Dapi glindesdi avess quai muntà 2G per omaduas varts. Per giasts senza in certificat da 2G datti uss la pussaivladad da cumprar ina carta dal di per Samignun cun in certificat ch'ins haja fatg in test negativ da corona. Perquai ch'i na dat anc nagin obligatori da certificat per las pendicularas en Svizra, è Samignun sa decidì da vinavant lubir 3G. Uffants survegnan la carta dal di da Samignun er senza in certificat.
Controlla entras paleras
La controlla è pussaivla entras las paleras ch'ins passa er normalmain en ils territoris da skis. Uschia vala la carta dal di da Samignun be da la vart svizra e na funcziuna betg sin las trais pendicularas che mainan al cunfin. Uschia po vegnir evità ch'insatgi sa tschenta per sbagl cun la carta dal di ad Ischgl.
