Sut il num «Avegnir Infra Scuol» avevan ins en mira da sviluppar e modernisar las infrastructuras turisticas - sco per exempel il Bogn Engiadina, il bogn avert a Trü, la halla da Gurlaina ed auter pli. Il project avess previs investiziuns da radund 45 milliuns francs.
Renovar l’infrastructura necessaria da la vischnanca vegn a custar radund 200 milliuns ils proxims onns.
La vischnanca da Scuol cun 6 fracziuns ha in'enorma infrastructura da basa basegnaivla, sco la chanalisaziun, sereneras, aua da baiver, sendas e vias, alps e bler auter pli . Quella infrastructura necessaria stoppia vegnir mantegnida. Perquai han quellas lavurs tenor la presidenta Aita Zanetti clera prioritad.
Consequenzas per il Bogn Engiadina Scuol
Il motor turistic Bogn Engiadn Scuol (BES) è era pertutgà da las mesiras, respectiv dal stop dal project «Avegnir Infra Scuol». En il rom da la cunvegna da prestaziun tranter la vischnanca da Scuol ed il BES vegn pajà a la BES ils proxims 5 onns in import da total 11,85 milliuns francs per mantegnair la gestiun annuala. Sustegns finanzials per sviluppar il BES n'èn per il mument però betg pussaivels.
I vala d'analisar il svilup da las finanzas da la vischnanca ils proxims onns per pudair guardar, sch'i dat ina nova libertad d'agir – er en connex cun projects dal BES. Il cussegl administrativ dal BES è ussa dumandà da far sias ponderaziuns e sia planisaziun per sviluppar vinavant las purschidas dal BES e dals indrizs Trü/Quadras uschia, ch'ellas restan attractivas er en l'avegnir.
